Accessibility links

VOA Akeyi Yon Responsab FanmCreole.Com


Tèm pwogram semèn sa a se magazin FanmCreole ak sit Entènèt FanmCreole.Com. Responsab seksyon "Mode et Beauté" nan piblikasyon sa a se Madmwazèl Eunia Destiné, ke nou te gen plezi akeyi nan studio VOA sa pa gen lontan.

Eunia gen yon mesaj apa pou jenn gason ak jenn fi kap suiv ribrik Syans ak Teknoloji a. Li di pou jenn yo, jenn medam yo, sila yo k' ap grandi, si yo ta renmen tounen yon mànken, yo ta rnemen parèt sou yon "revue," si yo ekri pwezi, nenpòt ki talan yo ta vle ekspoze, ebyen FanmCreole dispoze ede yo jwenn ouvèti sa a sou gran piblik la. Men jounal la ak sit Web la pa vize fi sèlman. Madmwazèl Destiné di nou jenn gason yo tou ta gen enterè vizite sit la e li magazin nan paske se yon atmosfè pozitif li kreye, li pale de bagay ki pozitif. FanmCreole ede yo konprann idantite yo pi byen, kimoun yo ye antan ke Ameriken ki gen orijin Ayisyen, san bliye enfòmasyon li ofri sou evènman k’ap dewoule nan kominote a.

Youn nan aspè ki enterese redaksyon an anpil, tankou nou te ka wè l nan premye edisyon magazin nan, se sa ameriken an rele "success stories," kidonk egzanp Ayisyen ak Ayisyen-Ameriken ki reyisi nan sosyete a pa bò isit, pou sa ka sèvi kòm motivasyon pou jenès la ak piblik la an jeneral. Li siyale yon interview FanmCreole te fè ak Marie St-Fleur ki nan Boston. Madam St-Fleur se premye Ayisyen-Ameriken ki te rive depite nan yon eta ameriken. Anpil moun pat konnen li, yo pat okouran Marie St-Fleur te reyisi nan nivo sa a. FanmCreole pale de li e gen anpil moun ki te sezi. Se egzanp, se modèl konsa FanmCreole Magazine ak FanmCreole.Com vle mete devan kominote a. Eunia Destiné ak tout ekip la, Lavwad Lamerik ap di nou kenbe la. Pa lage.

Klike sou lyen anlè atik sa a pou w ka tande edisyon 24 janvye 2005 la.

XS
SM
MD
LG