« Jodi a 18 novanm raple nou batay Vètyè ki ta pral bay peyi nou Ayiti endepandans li. Se jou sa a nou chwazi pou selebre fèt Mizik Mizik. Ane sa a nap selebre 38 lane. Menm si kè nou pa sou fete nap di Gran Mèt la mèsi pou bèl eksperyans sa a li pèmèt nou viv an fanmi », deklarasyon Fabrice Rouzier sou kont X li.
Youn nan prezantasyon memorab gwoup la pandan ane 2024 la se te 17 me ki te pase a nan Little Haiti Cultural Complex Miami. Lè sa a li t afiche ansanm ak yon lòt mapou mizik ayisyèn nan, Tabou Combo.
Daprè enfòmasyon k afiche sou platfòm mizik anliy yo, dènye albòm gwoup Mizik Mizik, « Ki moun ou ye », te soti nan lane 2018. Se te senkyèm albòm gwoup la. Avansa genyen « De ger » ki te soti an 2015 ; « Paradi nan lanfè », 2008 ; « Blakawout », 2001 ak « Farinay », 1989.
