Mwayen Oryan
Netanyahu Pran Angajman Vizavi Seselfe li Pwopoze pou Gaza ke Biden Apiye
Premye minis Izrayelyen Benjamin Netanyahu deklare Lendi ke Izrayel pran angajman vizavi seselfe li pwopoze pou Gaza a ak yon antan pou libere otaj yo. Chef lame bò kote pa li di yo prèske finn demantle fòs Hamas ki nan vil Rafah nan sid Gaza.
"Nou pran angajman vizavi plan Izrayelyen ke Prezidan Biden byen akeyi. Pozisyon nou pa chanje. Dezyeman, sa pa kontredi premye a lè nou di nou pap mete fen nan lagè a toutotan nou pa elimine Hamas epi toutotan sitwayen nan sid ak no yo ka retounen lakay yo sen-e-sof."
Lame Izrayelyen pibliye yon deklarasyon sou konsta li fè sou sityasyon an nan Rafah. Se Chef Deta Majò Lame a ki pibliye l. Se nan Rafah ke fos Izrayelyen yo ap goumen ak batayon Hamas ki toujou ap fonksyone yo.
Netanyahu voye jete avètisman yon komisyon Izrayelyen te fè pi bonè nan jounen Lendi a pou di lap mennen ankèt sou move konpòtman gouvènman an anski konsène acha soumaren ak bato misil ke li achte nan men Almay.
Komisyon an voye di Netanyahu ke selon prèv li ranmase jiskaprezan, li taka determine ke misye te pwofite pozisyon li kom premye minis ant ane 2009 ak 2016 pou l bay acha yo fe vèt san li pa respekte pwosesis pou fè sa.
Netanyahu reponn pou di ke soumaren yo "esansyèl pou garanti sekirite peyi a kont Iran.
Se gouvènman ki te vinn anvan Netanyahu ki te tabli komisyon sa a an 2022, e li di li pral pibliye talè konsa dokiman ki pa sekrè ki fè pati prèv li jwenn sou kontra pou achte ekipman militè a ki vo plizyè santèn milyon dola.
Pandansetan Minis Defans Izrayelyen Yoav Gallant rive Washington, Lendi. Li te vizite Depatman d Eta a kote li pral diskite sou pwochen faz lagè Gaza a ak ostilite kap ogmante sou fwontye Liban an.
Gen yon ti gwoup manifestan ki te kenbe pankat ki di
Libere Paltestin ki te kanpe bò kote bilding nan lè li te rive.
Galant di yo pare pou nempòt aksyon ki nesesè nan Gaza, Liban ak lòt kote ankò. Li di li pral rankontre tokay Ameriken li, Lloyd Austin epitou Sekretè d Eta Antony Blinken.
Pi bonè nan mwad Jyen an Hezbollah te sible vil Izraelyen ak baz militè ak yon seri obi ak dron apre yon atak Izrayelyen te touye komandan pi wo plase Hezbollah a.
See all News Updates of the Day
Blinken Tounen Izrayèl pou Rankont ak Responsab yo
Sekretè d Eta Ameriken Antony Blinken rive Izrayèl kote lap fè 11èm vizit li nan rejyon an depi kòmansman lagè Izrayelo-Hamas la.
Blinken ap rankontre responsab wo plase yo nan moman Etazini ap chache re bay jefo seselfe a jarèt apre asasina chèf Hamas la, Yahya Sinwar.
Jiskaprezan okenn nan pati kap fè lagè yo pap sede devan demann yap fè depi lontan.
Izrayèl toujou ap fè lagè ak Hamas plis pase yon lane apre atak 7 Oktòb militan yo te lanse kont li epi ak Hezbollah a nan Liban kote li lanse yon ofansiv terès pi bonè mwa sa a.
Izrayèl ta sipoze lanse frap ayeryen kont Iran tou apre atak ak misil balistik peyi sa a te lanse kont li, 1 Oktòb pase a.
Yon Anvwaye Espesyal Ameriken ap Vizite Liban pou Eseye Mete Fen nan Konfli a
Yoon anvwaye espesyal Ameriken vwayaje Liban pou rankontre ak otorite yo nan objektif pou ankouraje yo mete fen nan konfli ak Izrayel la.
Izrayel ap Sible Enstalasyon Finansye nan Liban
Lame Izrayelyen nan deklare lap sible kounyea branch finansye Hezbollah a e li gen entansyon atake yon dig dal sib nan Beirout ak lot kote.
Eksplozyon tanmen nan banlye sid Beirout yo apepre yon he d tan apre anons la Dimanch.
Yon responsab wo plase ranseyman Izrayelyen di atak yo vize al Qard al Hassan.
Oganizasyon sa a se yon ajans non gouvenmantal ki pa deye benefis ke ni Etazini ni Arabi Saoudit sanksyone e ki dispoze sevis finansye. Senp sitwayen Libane yo sevi ave l tou.
Izrayel di se yon inite Hezbollah a ke militan yo sevi pou peye moun kap travay pou gwoup sa a, ke Iran apiye.
Hezbollah di li te Vize Vil Haifa nan Nò Izrayèl
Hezbollah Libanè a te anonse li te lanse wokèt dimanch sou Haifa, pò prensipal la nan nò Izrayèl, kèk èdtan apre twa frap Izrayelyen sou katye nan sid Bewout.
Nan yon deklarasyon, mouvman pwo-Iranyen an, ki angaje depi 23 septanm nan yon twoke kòn ak Izrayèl, te endike konbatan li yo te lanse "yon latriye wòkèt" sou vil Haifa, "kòm repons" a atak sou katye nan sid Bewout, bastyon Hezbollah, fòs ayeryen Izraelyen an te bonbade pandan prèske yon mwa.
Etazini ap Mennen Ankèt Sou Yon Dokiman Ki Gen Ladann Plan Pou Izrayèl Atake Iran ki Pran Lari
WASHINGTON (AP) — Etazini ap mennen ankèt pou konnen kòman yon dokiman sekrè fè pran lari.
Dokiman klasifye sa ki te parèt sou telegram e li gen ladann plan Izrayèl genyen pou atake Iran apre dènye atak Iran te fè sou yo 1 Oktòb.
Dokiman an montre mouvman materyèl militè ke Izrayèl ap fè pou lanse yo atak militè an repons a atak misil balistik Iran an.
3 ofisyèl Ameriken te di The Associated Press ke otorite ameriken yo toujou ap mennen ankèt pou konn kòman dokiman yo pran lari, epi tou chèche konnen si se pa pirate yo pirate yo.
Yon katriyèm ofisyèl ameriken te di dokiman ki pibliye yo parèt lejitim.
Militè Izrayelyen an pa t reponn imedyatman a yon demann pou bay reyasksyon sou 2 dokiman sa yo ki te sou entènèt Vandredi sou Telegram nan.
Enfòmasyon yo te parèt nan dokiman kote yo evalye preparasyon pou atak la te fèt atravè itilizasyon analiz imaj satelit.
Facebook Forum