Jounalis VOA Kreyòl nan Pòtoprens di kout zam te marye maten an nan kapital la (Pòtoprens), sa ki te deklanche yon vag panik nan mitan popilasyon an.
Foto VOA Kreyòl resevwa montre twou bal plizyè kote nan ayeropò entènasyonal Toussaint Louverture la. Vòl ki te sipoze antre jodia anile, dapre sa VOA konstate sou App Flight Aware ki trake vòl kap antre-soti Ayiti.
Konpayi Ayeryen Ayisyen Sunrise Airways anonse lap sispann vòl li, paske lese frape kap dewoule nan kapital la mete lavi moun an danje.
Pandansetan, Premye Minis Ayisyen an, Ariel Henry rive nan peyi Kenya kote lap diskite ak responsab yo sou deplwaman yon fòs miltinasyonal pou ede Ayiti jere zak vyolans gang yo. Yon misyon ke Nasyonzini apiye e sipòte.
A midi, pi fò enstitisyon yo ak biznis ozalantou Pòtoprens te femen pòt yo epi plizyè milye moun te tounen lakay yo oswa chache yon abri kote yo kapab rete an sekirite.
"Jodia se 'Autre Chose'," Cherizier deklare, "Se gwoup ame yo, se lidè kominote yo, se lidè gwoup ame yo ki pran sou responsabilite nou mouvman kap fèt la a. Se poutet sa nou mande pèp la, nou ap nan lari a, lè nou wè nèg ak zam yo nou pa bezwen kouri."
Cherizier di mouvman li anonse a vize Premye Minis Ariel Henry, "politisyen santi yo" ak "oligak koronpi yo". Li di se yon mouvman pou chanje sistèm la konplètman.
Lè VOA mande l si lòt gwoup ame yo dakò, Cherizier ensiste pou di lap pale nan non "tout gwoup ame yo". VOA patka verifye deklarasyon sa a.
Sepandan, dapre youn nan jounalis Ayisyen ki pale ak VOA apremidi a, gang nan zon Santo pran yon otobis daso, sa ki sanble an dezako ak sa Cherizier te di nou pa rapo ak antant gang yo swadizan genyen pou yo pa sible popilasyon an.
Cherizier se yon ansyen polisye fòs polis nasyonal Ayiti (PNH). Etazini ak Nasyonzini te anonse sanksyon kont li nan mwad Oktob 2022.
Rezolisyon an te site Jimmy Cherizier kòm yon moun yo tapral sanksyone.
Lidè gang notwa G9 Fanmi ak Alye a te patisipe nan atak kote anpil sivil te mouri lè li te manm Fòs Polis Nasyonal Ayiti (PNH). Konsèy Sekirite LONU te di kowlisyon gang li dirije yo, responsab pou aksè ak tèminal petwòl Varreux a ke yo te bloke depi mitan mwad Septanm 2022. Se pi gwo tèminal petwòl peyi a - e sityasyon an te lakoz sityasyon imanitè Ayiti te vinn pi grav.
Korespondan VOA Kreyol nan Potoprens Matiado Vilme ak Yves Manuel kontribye a repotaj sa a, kek enfomasyon soti nan ajans nouvel Reuters
