Mwayen Oryan
Fòs Ameriken yo nan Irak ak Siri Resevwa Atak Wokèt ak Dronn
Fòs ameriken yo nan Irak ak Siri resevwa atak wokèt ak dronn 27 fwa pou pi piti nan jou ki pase yo, pandan Etazini ap deplwaye plis fòs nan rejyon an, se sa sekretè laprès Pentagòn nan Brigadye Jeneral Pat Ryder di madi.
Pou pi piti 7 nan atak sa yo te vini apre fòs ameriken yo bonè vandredi a te frape 2 enstalasyon nan lès Siri, kote Gad Revolisyonè Islamik Iranyen an ak gwoup ki afilye ak li konn opere.
Frap Etazini yo sete kòm repons pou atak anvan sa sou fòs ameriken yo, e atak ameriken yo te fèt sou mezi pou pwoteje epi defann sòlda ameriken ki baze nan Irak ak Siri, dapre Pentagòn nan.
Okenn nan atak ki fèt depi Etazini te lanse frap kif-kif vandredi a, pa te lakoz moun pèdi lavi ni fè dega, dapre responsab defans yo.
See all News Updates of the Day
Izrayèl di travayè èd Nasyonzini ki mouri nan atak sou Lekòl la se manm Hamas
Izrayèl defann atak li sou yon lekòl Nasyonzini ki te tounen abri nan sant Gaza e li di ke tout 6 travayè èd Nasyonzini ki pami 18 moun ki mouri yo se manm Hamas.
Irak ak Iran siyen 14 akò pou ranfòse koperasyon yo
Irak ak Iran siyen 14 akò Mèkredi pou "ranfòse koperasyon" ant 2 peyi vwazen yo. Prezidan Iranyen Massoud Pezeshkian ale Bagdad, pou li fè premye vizit li nan peyi etranje apre li te fin pase nan eleksyon.
Akò sa yo antre nan domèn edikasyon ak kominikasyon, agrikilti ak resous natirèl.
Pezeshkian di pwal gen komite pou kontwole aplikasyon akò sa yo, ki se yon "premye pa nan efò pou ranfòse koperasyon ant Iran ak Irak".
Etazini ak Angletè Akize Iran Dèske li Voye Misil bay Larisi pou Sèvi Kont Ikrèn
Etazini ak Angletè akize ofisyèlman Iran dèske lap founi Larisi misil balistik kout pote pou sèvi nan lagè li kont Ikrèn. 2 peyi yo di yo pral pran mezi pou pini tout moun ki konsène.
Sekretè d Eta Antony Blinken di yo pral anonse sanksyon yo pi ta Madi.
Blinken di Larisi "deja resevwa kagezon misil balistik yo e gen anpil chans pou l itilize yo nan semèn kap vini yo kont Ikrèn ak Ikrenyen."
Blinken te pran la pawòl bò kote Minis Afè Etranjè Britanik la David Lammy pandan yon vizit nan Lond.
Blinken ak Lammy tap pare pou yo fè yon vizit ansanm Mèkredi nan Ikrèn kote yo pral rankontre Prezidan Volodymyr Zelenskyy ak lòt responsab wo plase pou diskite sou sistèm defans peyi a.
Etazini Pran Nouvo Sanksyon kont Iran pou Livrezon Misil bay Larisi
Etazini te di ke Iran te lage misil bay Larisi pou itilize nan Ikrèn "nan semèn kap vini yo", e li te anonse nouvo sanksyon iminan kont Teheran pami yo an patikilye kont konpayi avyon nasyonal Iran Air.
Sekretè Deta Ameriken Antony Blinken te di nan yon konferans pou laprès nan Lond.
"Kounye a, Larisi te resevwa livrezon misil balistik sa yo epi li pral gen anpil chans itilize yo nan semèn kap vini yo nan Ikrèn kont Ikrenyen yo".
- Serge Michel
Plizyè Douzèn Moun Asiste Fineray yon Amerikèn-Tik ki Mouri Pandan li Tap Manifeste nan Gaza
Plizyè douzèn moun asiste lantèman yon manifestan Ameriken-Tik ki mouri anba bal solda Izrayelyen yo. Dapre temwen yo, dam lan tap patisipe nan yon manifestasyon pasifik.
Facebook Forum