Accessibility links

Breaking News

Mwayen Oryan

Taliban Kondane Frap ak Drone ki Touye Chef al-Qaida a

Al-Qaida Zawahri

Nan Afganistan, Taliban an kondane mèkredi frap ak drone ki touye chef al-Qaida ki te nan mawon Ayman al-Zawahiri nan Kaboul pandan wikenn-nan, men li di ke yo te toujou pa gen okenn enfòmasyon sou moun ke atak-la te vize-a e li renouvle detèminasyon Taliban pou konbat aktivite teworis.

Abdul Salam Hanafi, 2èm vis premye-minis Taliban, te pale konsa ak jounalis nan kapital Afganistan-an nan sa ki te premye reyaksyon dirijan islamik-yo pou asasinay mastèbrenn teworis-la, apre Prezidan Etazini Joe Biden te konfime lanmò-a lendi swa.

Prezans Zawahiri nan yon katye deluks nan Kaboul parèt kòm yon kou ki imilye Taliban, ki te sezi pouvwa-a sa gen prèske yon lane e ki ap chache lejitimite entènasyonal pou rejim-li-a.

See all News Updates of the Day

Afghanistan: Gen Yon Lane Depi Taliban yo Retounen o Pouvwa

Yon lane apre Taliban te retounen nan pouvwa-a, efò gwoup islamis-la pou jere yon ekonomi ki te sou lagraba akoz sechrès, pandemi Covid-19-la, ak konfyans redui nan gouvènman ke-l te jete-a, yo pa debouche sou okenn siksè.

Nan dènye ane fiskal anvan gouvènman koalisyon Ashraf Ghani ke loksidan te apiye-a te kraze – 2020-2021 – 75 pousan depans leta ki soti nan bidjè 5 milya 500 milyon dola pou ane-a te chita sou èd etranje. Men kite Etazini te kite peyi-a, èd entènasyonal sivil ak èd sekirite te kanpe san avètisman e sanksyon te tonbe sou nouvo dirijan-yo.

Etazini te pran pifò nan rezèv lajan ke peyi-a te gen nan peyi etranje, kote li bloke apeprè 7 milya dola ke bank santral Kaboul-la te depoze nan Etazini, kote gouvènman ameriken-an di l-ap remèt yo lajan-an si gen alye-mye nan dwa fanm-yo e si gen fòmasyon yon gouvènman ki gen divès tandans ladan.

La Jistis Ameriken Akize yon Ajan Iranyen Dèske li tap Konplote pou Asasinen John Bolton

Foto Achiv: Ansyen Konseye Lamezonblanch pou kestyon Sekirite Nasyonal John Bolton.

Depatman Jistis Etazini fè konnen li akize yon ajan Iranyen an koneksyon ak yon konplo pou asasinen ansyen konseye administrasyon Trump la sou kestyon sekirite nasyonal, John Bolton.

Otorite Ameriken yo idantifye sispèk la kom Shahram Pourfasi, ki se yon manm Gad Revolisyonè Iran an.

Yon foto FBI pibliye 10 Out 2022 nan Washington, montre mand d'are pou Shahram Poursafi.
Yon foto FBI pibliye 10 Out 2022 nan Washington, montre mand d'are pou Shahram Poursafi.

FBI ap chache misye an koneksyon ak konplo asasina a, ke Etazini kwè te revanj pou yon atak ayeryen li te lanse ki te touye yon jeneral ki te gen anpil pouvwa e ki te popilè anpil ann Iran.

Nan yon deklarasyon li pibliye Mèkredi, Bolton remèsye FBI ak Depatman Jistis la pou travay yo. Li di li paka di anpil bagay an piblik men ke lidè Iranyen yo se yon bann "mantè, teworis ak enmi Etazini."

Iran: 10 Moun Pèdi Lavi yo Anba Kout Kouto

Yon nonm dapre sa yo di ke tèt li pa two byen te touye 10 moun ak kout kouto andeyò Kerman, ki sitiye nan sid Iran. Lapolis te mete la pat sou misye yon ti tan aprè.

Hossein Rezai, gouvènè enterimè nan vil la te deklare ke aksyon sila te pase ayè dimanch lan misye rive komét zak sa akòz yon diskisyon pèsonèl li te genyen ak kèk moun.

6 Afgan ak 4 Iranyen te mouri nan atak sa a e yon moun te soti blese tou, Rezai te di.

Yo te arete sispèk la pandan li tap eseye kite pwovens lan.

Dapre chèn televizyon leta Irib, nonm sa a, ke yo pa revele idantite li, se on moun ki" enstab mantalman " e li se on dwòge.

Atak Ayeryen Izraelyen Touye yon Dezyèm Kòmandan Wo Plase Jihad Islamik la

Paran Muhammad Hassouna ki mouri nan atak ayeryen Izrael la pote dey pou li anvan fineray li nan Rafah, Sisjodani, Dimanch 7 Out 2022.

Izrael fè konnen li touye yon kòmandan wo plase Jihad Islamik la nan yon atak ayeryen kont yon bilding rezidansyèl nan yon kan refije nan Gaza kote yon pakèt moun ap viv.

Se dezyèm atak konsa ki sible gwoup militan an wikèn sa a.

Gwoup militan an, ke Iran apiye lanse dè santèn obi kont Izrael pou reponn atak sa a. Sa ogmante risk pou batay kap fèt ant 2 kan yo vinn tounen yon lagè tout on.

Hamas, ki dirije Gaza te goumen pandan 11 jou kont Israel nan mwad Me 2021. Pou kounyea lap swiv.

Sanble Hamas gen kè sote pou Izrael pa pran reprezay kont li si li antre nan batay la. Sa takapab defèt tou, antant ekonomik li genyen ak Izrael, ki gen ladann pèmi travay pou dè milye sitwayen Gaza, ki te vote pou Hamas pran kontwòl teritwa a.

Izrael ak Militan Gaza yo Twoke Kout Zam

Timoun kriye pandan fineray Palestinyen Tamim Hijazi ki mouri nan yon atak ayeryen Izraelyen nan Khan Younis, 6 Out, 2022.

Dènye konfwontasyon ant Izrael ak militan Gaza yo antre nan dezyèm jounen li pandan ke avyon Izraelyen yo ap frape sib nan Gaza epi atak ak fize ap pèsiste nan sid Izrael.

Otorite Palestinyen yo di gen omwens 15 moun ki mouri nan Gaza, pami yo yon lidè militan wo plase ak yon tifi 5 an.

Bagay la te komanse ak atak Izrael la ki te sible militan an - yon komandan wo plase Jihad Islamik Palestinyen an - Vandredi.

Lidè Hamas yo sanble yap swiv jiskaprezan, ki lakoz entansite konfli a pa ogmante - pou kounyea.

Izrael ak gwoup militan Hamas Palestinyen an fè lagè 4 fwa deja epi goumen nan batay mwen sevè plizyè fwa pandan 15 zan ki pase yo.

Load more

XS
SM
MD
LG