Accessibility links

Breaking News

Pap Francois Eksprime Kѐ-Sote Sou Vyolans nan Ekwatè, Ayiti, ak Ikrèn


Pap Francois prezide yon mes nan Vatikan an, Samdi 25 Jyen 2022.

Nan mesaj Pap Franswa mete devan fidѐl yo yѐ dimanch 26 jen an, li te santre atansyon li sou 3 peyi: Ekwatѐ, Ikrѐn avѐk Ayiti. Serge F Michel ap di nou plis.

Pap Franswa eksprime kѐ-sote li dimanch 26 jen an akoz evennman ki fѐk dewoule nan peyi Ekwatѐ, kote pѐp la te òganize toupatou nan kapital la manifestasyon vyolan pou l pwoteste kont mank manje ak gaz.

Pap la, ki te pran lapawol devan yon foul fidel sou Plas Sen Pye, pale de espwa li genyen pou chanjman pozitif fet; li espere chanjman sa a pap pran two lontan pou l rive.

"Mwen espere ke, anvan lontan, nou va kapab jwenn lapѐ sosyal avek yon atansyon espesyal pou sila yo ke sosyete-a mete sou kote, ak pòv yo; men toujou avѐk respѐ pou dwa tout moun e pou enstitisyon peyi yo.”

Pap Franswa pale tou de yon mè italyѐn ki pѐdi lavi li ann Ayiti e ke l konsidere kòm yon “mati”. Non li se Luisa Dell’Orto, ki te gen 64 lane, e ki tap travay ak timoun pov yo nan Pòtoprens. Dyosez vil Milan, ann Itali, deklare –nap site: “Yo asasinen mè a nan yon atak ame; siman moun ki atake l yo t ap chache komѐt yon vòl nan Pòtoprens, kapital Ayiti a.

Dapre sa laprѐs ofisyѐl Vatikan an di jounalis yo, yo te kouri lopital ak Sѐ Dell’Orto, ki te blese grav; men li sikonbe anba blese l yo yon ti moman apre l te rive lopital la.

Pap la kontinye pou l di kijan li te gen bon rapò ak manm fanmi mè a e li fè sonje ke viktim nan t ap viv ann Ayiti depi 20 lane; prensipal travay li, sete konsakre lavi li nan efò pou ede timoun pòv k ap viv nan lari yo.

Pap la te di tou kѐk pawòl espesyal, men tris, sou lagѐ k ap fѐ raj nan Ikrѐn nan, yon lagѐ ki rive sou 5ѐm mwa l kounyela a.

Mwen wѐ gen kѐk drapo Ikrèn isit la. Laba a, nan Ikrѐn, bonbadman yo ap kontinye, yo kontinye lakoz lanmò, destriksyon ak soufrans pami pѐp la. Tanpri souple, pinga nou bliye moun sa yo kap viktim nan lagѐ a… Mwen menm avѐk nou, pinga nou bliye yo nan kѐ nou ak nan priyѐ nou.

Pap Franswa prezante mesaj sa a nan lamѐs li chante chak dimanch nan Legliz Sen Pyѐ nan Vatikan.

XS
SM
MD
LG