Yon video kote yo anrejistre atak la, ki dewoule lendi, montre moun ki te kanpe dèyè anbasadè a pou yo voye penti wouj sou li anvan yo lòt militan, ki te bò kote l, te benyen figi l ak penti nan moman yo t ap pwoteste kont envazyon Larisi nan Ikrèn nan.
Manifestan yo te ansèkle Anbasadè Andreyev pandan yo te gen drapo nasyonal Ikrenyen an nan men yo e yo t ap chante: “Fachis! Fachis!” Yo anpeche diplomat la ak delegasyon li a depoze jèb flè a nan simtye a pou make defèt Lalmay Nazi an 1945.
LaPolòy se youn nan peyi ki plis kritike envazyon Larisi a. Plis pase 3 milyon 200 mil refijye ikrenyen travèse fwontye a pou y al viv nan Polòy akoz lagè k ap dewoule nan peyi yo depi 24 fevriye pase a.
