Associated Press
Plis pase yon douzèn mesye antre nan yon òfelina ke Ameriken ap jere nan kapital Ayiti a Pòtoprens, kote yo touye gad sekirite a e apre sa vyole 2 tifi ak yon dam, dapre sa administratè a di ajans nouvèl Associated Press madi 13 Avril la.
Ensidan an rive Dimanch swa nan òfelina ki rele Chanje Lakay nan Potoprens, dapre sa administratè Brayann Clerje fè konnen.
Administratè a di, "Timoun yo anba gwo chòk."
Msye Clerge fè konnen mesye yo vòlè bag maryaj li, yon televizyon ak plis pase mil-500 dola cash epi yo bat li-menm ak madanm li.
Pa gen arestasyon ki fèt, e lapolis pa t retounen apèl touswit pou pale sou kesyon an.
Ajans ki responsab òfelina a se The Global Mission, Misyon Mondyal la, yon Ministè charite kretyen ki pa depann de okenn relijyon e ki pa la pou fè benefis, e ki baze nan Awondisman Orange nan eta Kalifòni. Administratè Dave Brodsky di Associated Press ke travay yo ann Ayiti se sèvi timoun abandone.
Li di, "Nou pa pral mete plis chòk sou yo ni fè yo viv ak yon etikèt akoz kòmantè an piblik sou yon ankèt kap fèt sou yon sityasyon trajik ke kriminèl yo lakoz."
Arielle-Jeanty Villedrouin, ki se alatèt Enstiti Byennèt Sosyal ann Ayiti, fè konnen òfelina a soumèt tout dokiman nesesè men, Enstiti a poko sètifye yo, e ke otorite yo nan wout pou yo mennen ankèt sou sa ki rive a.
Òfelina a ap fonksyone depi 8 lane e sèvi 36 ti gason ak tifi nan laj 4 a 18 lane, dapre Clerge, ki fè konnen yo deplase òfelen yo tanporèman pou rezon sekirite.