Accessibility links

Vyolans Ranfòse nan Damas, Kapital Siri: Omwen 55 Moun Mouri; 370 Lòt Blese


Enspektè siryen sou plas apre yon eskplozyon kraze biwo sèvis sekrè a nan Damas -- 10 me 2012 (Foto VOA).
Nan Siri, eksplozyon 2 machin pyeje nan kapital la, Damas, tou prè yon biwo sèvis sekrè peyi a, touye omwen 55 moun tandiske yon afè de 370 lòt blese. Se zak vyolans ki koze plis dega nan Siri depi yon mouvman leve-kanpe te kòmanse sa genyen 14 mwa. Chèf misyon obsèvasyon Nasyon Zini an nan peyi a, Majò-jeneral Robert Mood, pale nan televizyon pou l kondane zak sa a. Jeneral Mood deklare –nap site:

“Zak sa yo se zak ki deplorab. Sa dwe sispann. Kèlkeswa moun kap apiye bagay sa a --kit yo anndan Siri, kit yo andeyò Siri-- yo dwe konprann zak konsa pral pote plis soufrans pou pèp siryen an. Yo dwe mete fen nan zak sa yo e bay pèp siryen an yon chans pou l avanse sou wout lapè, san nou pa wè moun inosan kap mouri nan lari.”

Gouvènman siryen an lonje dwèt sou sa li rele “teworis” kòm moun ki ta responsab eksplozyon sa yo ki pa sispann fè dega ak viktim nan Siri. Sa pa gen lontan, minis defans Lèzetazini an, Leon Panetta, te pale ak laprès pou l di, daprè rapò sèvis sekrè ameriken an resevwa, sanble al-Kaida ta trèzaktif nan peyi Siri. Misye Panetta di –nap site tou :

“Kèlkeswa kote al-Kayda ye, se yon preokipasyon pou nou ; e, daprè enfòmasyon nou resevwa, al-Kaida prezan nan peyi Siri. Sepandan, pou m pale franchman, nou pa konnen egzatteman ki kalte aktivite rezo a ap mennen. Se pou sa nou pa kapab di avèk presizyon kisa lap fè, kisa li pap fè. Sepandan sa ban nou preokipasyon; e franchman nou dwe kontinye fè tout sa n kapab pou n konnen ki tip enfliyans lap chache egzèse nan Siri. »
XS
SM
MD
LG