Prezidan Donald Trump fè konnen li konsidere chita-pale palmantè tou 2 pati yo ap fè nan Kongrè a sou miray li vle konstwi sou fwontyè Etazini pataje ak Meksik la kòm yon pèt de tan.
Nan yon entèviou Mesye Trump bay jounal ameriken The New York times nan Lamezon Blanch nan dat 31 janvye a, li fè konprann kòmkwa li ta pare pou l deklare yon ijans nasyonal isit Ozetazini, dekwa pou'l kite kongrè dèyè nan demach pou l bati mi an san apwobasyon li.
Lidè ameriken an di, "Ret gade pou wè, mwen deja plase kouvè sou tab la, mwen deja pare sèn nan pou sa m pral fè a. Si palmantè nan 2 kan yo pa parèt ak yon akò nan mwens pase 3 semèn, mwen kapab refèmen gouvènman federal la.