Omwen 30 sòlda ak polisye mouri nan yon atak militan taliban lanse sou yon avan-pòs lame a nan provens Baghlan nan nò Afghanistan. Atak jodi mekredi-a rive plis pase yon jou apre militan taliban yo te pran kontwòl yon baz lame a nan provens Faryad apre plizye jou batay san pran souf nan zòn nan. Otorite yo di: lame Nasyonal Afghan an te pèdi kontwòl baz la poutèt solda yo pat rive resevwa ranfò yo te bezwen an .
Anplis desa, yo pat gen apwi ayeryen alòske ekipman yo ak munisyon yo te fini. Responsab militè ak otorite nan rejyon an konfirme bay Lavwad Lamerik nouvèl kòmkwa ant 40 e 70 sòlda afgan ki deplwaye nan baz la rann tèt yo bay militan taliban. Yo presize rès sòlda yo swa pèdi lavi yo nan afwontman yo oubyen kouri al kache nan mòn ki tou pre yo pandan lese-frape yo.