Accessibility links

Ayisyen nan Miami Reyaji sou Pawòl Swadizan Degradan Prezidan Trump yo

  • Ekip Sèvis Kreyòl VOA

Prezidan Donald Trump ki tap pale nan Sal Roosevelt la nan La Mezon Blanch nan rankont kote li ta deklare: "Ayiti, Salvadò ak peyi afriken yo se "twou ki plen ak malpwòpte." Foto: 11 janvye 2018.

Nan Miami, imigran ayisyen yo reyaji sou deklarasyon Prezidan ameriken an, Donald Trump, ta swadizan fè pou l di Ayiti, Salvadò ak peyi afriken yo, se “twou ki plen ak malpwòpte”.

Imigran ki reponn kesyon jounalis Lwavwadlamerik Serge F. Michel, di se yon mank dega pou tout ayisyyen; e, ak yon deklarasyon konsa, Misye Trump montre li pa gen kontwòl sou santiman anti-imigran li, sou santiman totalman rasis li. Yon ayisyano-ameriken deklare:

<< Mwen pat espere okenn lòt bagay nan men Trump. Mwen te prevwa sa ta pral rive. Misye se lajan li konnen e se moun ki gen lajan li konnen. Si l pat gen lajan, li pa tap prezidan jounen jodi a. >>

Yon lòt imigran poze kesyon pou l mande: <<Kisa mwen fè Trump pou l pa vle wè m nan? Pou l pa vle wè pitit mwen? Mwen antre isi depi nan ane 80 yo. Kote Trump te ye? Etazini se yon peyi lib; li gen plas pou tout moun. Lè Trump mete m deyò, ki kote mwen prale apre tout tan sa a? >>

Nan komansman jounen vandredi 12 janvye 2018 la, Prezidan Trump ekri sou kont twitter li yon nòt kote li deklare: <<Se Swa jamè; mwen pat janm fè yon deklarasyon konsa. Se lidè Demorkat yo ki envante pawòl sa a. Sèl sa mwen te di, sè yon bagay tout moun ka konstate klèman: sè ke Ayiti se yon peyi pòv ki chaje ak pwoblèm. >>

Sepandan, nan menm jounen vandredi a, Senatè ameriken Dick Durbin (D-Ilinwa) fè laprès konnen mo “twou plen ak malpwòpte a” se egzatteman pawòl ki te sòti nan bouch Prezidan Donald Trump; e li pa t di mo sa yo “yon sèl fwa, men plizyè fwa”. Daprè Misye Durbin, se pawòl “moun lari”, “vilgè’ e “rasis”.

Nouvèl yo fè konnen otorite ayisyen yo te konvoke Chagé d’Affaires ameriken an nan Pòtoprens, Robin Diallo, pou l bay eksplikasyon sou deklarasyon Prezidan Donald Trump la. Konvkasyon s a te dewoule nan jounen vandredi 12 janvye 2018 la.

XS
SM
MD
LG