Accessibility links

Echèk yon Lòt Konplo Al-Kayda Pou Atake Lèzetazini

  • Ekip Sèvis Kreyòl VOA

Otorite ameriken yo fè konnen branch rezo Al-kayda a nan peyi Yemèn te gen plan pou li plase yon yon pasaje ak eksplozif anba rad-li abò yon avyon ki ta gen pou ale Ozetazini.

Daprè menm otorite yo, ajan ameriken kap travay sou kesyon anti-teworis rive dejwe plan sa a e yo mete men sou eksplozif yo anvan okenn avyon te an danje.

Richard Clarke, yon ansyen konseye ameriken sou kesyon lit kont teworism, deklare:

“Responsab gouvènman ameriken an fè konnen konplo sa a pat menm rive nan nivo egzekisyon, paske moun ki te mele nan operasyon an te ba yo enfòmasyon sou sa. Sa vle di, yo te genyen moun anndan konplo a ki pa ta pral kite plan reyisi."

Nan yon deklarasyon Konsèy Sekirite Nasyonal Mezon Blanch la fè parèt lendi 7 me 2012 la, responsab yo te mete Prezidan Barack Obama okouran konplo a depi nan mwa d Avril pase a; depi lè sa a se detanzantan yo te fè l konnen kijan sitiyasyon an t ap evolye.

Minis defans ameriken an, Leon Panetta, pale pou l di Lèzetazini dwe toujou rete vijilan pou l fè fas ak tout atak posib.

Minis Panetta deklare:

“Mwen pap fè pyès kòmantè sou operasyon sekrè an patikilye, eksepte pou m di Lèzetazini ap mennen yon seri operasyon pou l konbat al-Kayda ak alye militan li yo, ak alye teworis li yo, ki pap ezite atake Lèzetazini. Si gen yon bagay ensiden sa a montre aklè, sè ke peyi nou an dwe toujou rete sou le kiviv kont sila yo ki dispoze atake nou e nou pral fè tout sa k nesesè pou nou mentni sekirite Lèzetazini.”

Daprè ajans nouvèl Associated Press, swadizan atakan an se yon moun kap viv nan peyi Yemèn, e objektif plan an se pou atak la te dewoule nan okazyon premye anivèsè operasyon desantdelye ki te touye lidè rezo al-Kayda a, Osama bin Laden.

Menm ajans la di tou atakan an potko achte tikè davyon li, ni non plis tou li potko chwazi yon konpayi ayeryèn pou li te atake.
XS
SM
MD
LG