Accessibility links

Breaking News

Etazini-Prezidansyèl : Deba Chofe ant 2 Kandida pou Pòs Vis-Prezidan an


2 kandida pou pòs Vis Prezidan an: Gouvènè Mike Pence (Eta Indiana, adwat) ak Sen. Tim Kaine (Eta Vijini).

Ozetazini, kandida a la prezidans Pati Repibliken an, Donald Trump, te mennen kanpay nan jounen madi 4 oktòb la nan eta Arizona, nan lwès peyi a, tandiske rival demokrat lia, Hillary Clinton, te òganize yon meeting de mas nan Eta Pennsilvani.

Sepandan atansyon obsèvatè yo te santre sitou sou Eta Vijini kote kolistye 2 kandida yo --sa vle di kandida pou pos Vis Prezidan an, Mike Pence pou Donald Trump ak Tim Kaine pou Hillary Clinton-- te fè yon -fas-a-fas nan sèl deba yo gen sou pwogram yo anvan eleksyon an dewoule nan dat 8 novanm 2016 la.

Aprè 2 kandida pou pòs Vis Prezidan an te bay yon lanmen amikal, yo te tanmen deba a ki pat pran tan pou l chofe seryezman apre Misye Kaine te fòse advèsè l la, Mike Pence, defann kandida Donald Trump poutèt yon seri deklarasyon ki pwovoke gwo-pawòl anpil pandan kanpay la. Kandida Kaine di :

Senatè Tim Kaine (kravat wouj) tap reponn yon kesyon pandan Gouvènè Pence tap koute.
Senatè Tim Kaine (kravat wouj) tap reponn yon kesyon pandan Gouvènè Pence tap koute.

“Pandan kanpay sa a Donald Trump di li konsidere meksiken yo kòm moun kap vyole fi e kòm kriminèl. Li rele fanm yo vakabond, kochon, chyen e degoutan. E li komèt tout move zak sa yo e li te bay manti san wont sou Prezidan Barack Obama lè te di Prezidan an pat yon sitwayen ameriken.”

Advèsè repibliken Misye Kaine nan, Mike Pence, te kouri bay repons sa a:

“Si Donald Trump pale konsa vrèman, li poko prèt pou rive nan nivo deklarasyon Hillary Clinton te fè lè l te di mwatye nan patizan nou yo se yon bann moun mizerab, minab e yo se moun ki pa gen valè ditou-ditou.”

Moderatris deba a, Elaine Quijano, jounalis chèn televizyon CBS. Fasafas la te dewoule nan Inivèsite Longwood, nan vil Farmville, Eta Vijini
Moderatris deba a, Elaine Quijano, jounalis chèn televizyon CBS. Fasafas la te dewoule nan Inivèsite Longwood, nan vil Farmville, Eta Vijini

Pandan tout deba a, detanzantan youn nan 2 kandida yo te entèwonp lòt la; men, pandan pi fò tan an, Misye Kaine ak Misye Pence te frape kòn yo sou kesyon politik etranjè Lèzetazini. Kandida repibliken an di Lèzetazini vin pi fèb sou administrasyon Prezidan Obama a. Yon deklarasyon Tim Kaine rejte kategorikman avèk illistrasyon.

Fas-a-fas ant Mike Pence ak Tim Kaine nan dewoule kèk jou anvan Misye Trump ak Madan Clinton rankontre pou yo fè 2èm deba yo ki pral dewoule dimanch 9 oktòb 2016 la.

XS
SM
MD
LG