Accessibility links

Breaking News

Vizit Prezidan Obama nan Orlando Aprè Atak sou Night Club Pulse la ki te Fè 49 Mò


Yon moun ki pataje dèy fanmi viktim yo, tap patisipe nan yon retrètoflanbo nan vil Atlanta, Eta Jòji, kote li kenbe yon chandèl ak yon ti drapo Ameriken aprè atak ki te fèt nan bwatdenui Orlando a dimanch 12 jen 2016 la (Foto: AP Photo/David Goldman).

Prezidan Barack Obama prale nan vil Orlando, Eta Florid, jedi 16 jen 2016 la nan kad sa La Mezon Blanch rele "yon responsablite solanèl" li genyen kòm lidè nasyon an pou l rekonfòte pèsonèlman yon kominote ki an dèy. Misye Obama ap fè vizit sa a aprè yon atakan te ouvè kout-zam nan yon bwatdenui dimanch 12 jen pase a nan Orlando kote li te touye 49 moun epi blese 53 lòt. Prezidan an pral rankontre ak manm fanmi viktim yo, sivivan yo, otorite lapolis, sèvis anbilans, enfimyè, doktè, ak chirijyen ki te ede blese yo.

Sen. Chris Murphy (D-Conn.) ki te pran kòn nan nan chanm Sena a sou Kapitòl la nan Washington, kote li te egzije vòt yon nouvo lwa sou plis kontwòl zam Ozetazini. (Foto: 15 jen 2016).
Sen. Chris Murphy (D-Conn.) ki te pran kòn nan nan chanm Sena a sou Kapitòl la nan Washington, kote li te egzije vòt yon nouvo lwa sou plis kontwòl zam Ozetazini. (Foto: 15 jen 2016).

Sou menm dosye a, apre manm Kongrè te pase plis ke 3 zan ap fè diskou an ven pou mande depite ak senatè pran aksyon pou konbat vyolans ak zam kap ogmante Ozetazini, Senatè Chris Murphy --yon Demokrat ki reprezante Eta Connecticut nan gran kò a-- te deside pase alaksyon nan jounen mèkredi 15 jen an. Li te pran kòn nan pou l te pale nèt jiskaske kòlèg li yo (Demokrat ak Republiken) ta aksepte fè yon jan pou yo kontrekare vyolans ame nan peyi a.

Plizyè palmantè demokrat parèy Senatè Murphy te pote-kole avèk li pou yo eksprime mekontantman yo ak fristrasyon yo devan mank aksyon Leta ameriken sou dosye a. Yon lòt senatè Eta Connecticut, Demokrat Richard Blumenthal, te pale pou l eksprime santiman kòlèg li yo.

“Nou twouve nou isit la pou n mande aksyon, paske sa gen twò lontan deja depi nap ranvwaye aksyon nou dwe pran pou n evite vyolans ame, pou n evite kalte zak lahèn ak zak teworis ki rive nan Orlando yo. Aksyon pale pi fò pase pawol; e nasyon an merite pou n pran aksyon. 90 pousan pèp ameriken an mande pou n pran dispozisyon dyanm, dispozisyon ki fè sans, tankou pou n tcheke dosye kriminèl tout moun kap achte zam; pèp la vle pou Sena a adopte yon lwa nan sans sa a.”

Senatè Chris Murphy --ki te lanse mouvman diskou san rete sa a nan Sena a-- se palmantè ki leve vwa l pi fò e pi souvan pou l mande plis kontwòl zam Ozetazini depi yon nèg ame te touye 20 elèv-lekòl nan Connecticut an desanm 2012. Seri diskou manch-long sa yo sou menm sijè a nan jounen mèkredi a te dire prèske 15 zèd tan.

XS
SM
MD
LG