Accessibility links

Breaking News

Ayiti Politik: Asanble Nasyonal la Pral Reyini sou Avni Prezidan Jocelerme Privert


Prezidan Pwovizwa an, Jocelerme Privert

Dezyèm sesyon òdinè 50èm lejislati peyi d Ayiti a kòmanse nan jounen lendi 13 jen 2016 la avèk patisipasyon plis pase 80 depite ak anviwon 20 senatè. Seyans la te louvri nan moman traktasyon ap fèt pou konnen si palman an ap vote pou kenbe Jocelerme Privert kom lidè tranzisyon politik la ou byen ranplase l. Nap raple ke tan Prezidan Pwovizwa a te genyen pou l ranpli manda Akò 5 fevriye a te ba li a ap ekspire madi 14 jen 2016 la a minwi.

Se prezidan Chanm Depite a, Cholzer Chancy, ki te prezide seyans la an absans prezidan sena a (yon pòs ki vid depi Misye Privert te monte nan plas Prezidan Pwovizwa a). Diskisyon yo te dewoule sou rapò komisyon Verikasyon ak Evalasyon Elektoral la ki remete an kesyon manda plizyè dizèn depite ak 3 senatè. Misye Chancy di rapò a pa kapab anile desizyon Biwo Kontansye Elektoral Nasyonal la (BCEN) te pran anfavè eli sa yo. Yon lòt kote, prezidan chanm bas la kwè tan kalandriye elektoral la prevwa pou 2 tou eleksyon yo dewoule;li ensiste sou posiblite pou eleksyon yo fin fèt nan yon espas tan ki pi kout.

please wait

No media source currently available

0:00 0:06:14 0:00
Direct link

Nouvo regwoupman politik Entente Démocratique (ED), ki gen nan tèt li ansyen Premye Minis Evans Paul, te òganize yon veye patriyotik lendi 13 jen 2016 la ak patisipasyon plizyè diyitè tankou kandida a la prezidans PHTK a, Jovenel Moise. Misye Paul te pran lapawòl nan sikonstans la pou l mande popilasyon an patisipe nan yon manifestasyon kap dewoule nan jounen madi 14 jen an pou fòse Prezidan Privert kite pouvwa a.

Anfen, 46èm asanble jeneral òdinè Oganizasyon Eta Ameriken yo demare lendi 13 jen an nan Santo Domingo, Repiblik Dominikèn, ak patisipasyon delege ki nan diferan peyi manm yo. Jacquelin Belizaire, anvwaye espesyal nou nan kapital Peyi Panyòl la, di nou delege yo pral travay ansanm pou yo jwenn mwayen ki pi bon pou leve defi peyi nan rejyon an ap konfwonte. Tèm asanble ane sa a se: "Ranfòsman Enstitisyonèl pou yon Devlopman Dirab nan Amerik yo."

XS
SM
MD
LG