Accessibility links

Breaking News

Ayiti/Vyolans: Bilan Definitif sou Operasyon Nèg Ame Te Mennen nan Vil Okay La


Kèk manm Polis Nasyonal d Ayiti a (PNH)

Otorite Polis Nasyonal d Ayiti (PNH) nan vil Okay rankontre laprès madi 17 me 2016 la pou yo te bay detay final sou ankèt yap mennen sou atak nèg ame te lanse sou komisarya vil la nan nwit dimanch 15 pou leve lendi 16 me 2016 la. Daprè pòtpawòl lapolis la nan Okay, Guerline Dimanche, 3 nan atakan yo anba men otorite yo e gen 6 ki mouri nan aksidan machin yo tap itilize pou yo chape apre atak la. Korespondan nou Jean-Hernst fè n konnen atakan yo te touye yon polisye nan komisarya a anvan yo te pran wout Dichiti kote aksidan an rive a. Kidonk, bilan total mò yo se 7. Pandansetan, prezidan komisyon jistis ak sekirite nan chanm bas la, Depite Price Cyprien, anonse komisyon lap dirije a pral mennen yon ankèt sou zak sa a.

please wait

No media source currently available

0:00 0:10:03 0:00
Direct link

Sou plan politik la, prezidan chanm depite a, Cholzer Chancy, pa ekate posibilite pou ta gen yon konsansis pou pwolonje manda Prezidan Jocelerme Privert a e pèmèt li rete sou pouvwa a apre 14 jen 2016. Depite sikonskripsyon Ennri a di li toujou rete akwoche ak Akò 5 fevriye a.

Korespondan nou nan Pòtoprens, Orpha Dessources, di nou Depite Chancy ak prezidan a..i. sena a, Ronald Larèche, te rankontre ak 2 lidè sosyete sivil la, an palan de dirijan RNDDH la, Pierre Esperance, ak lidè CONANE nan, Pastè Edouard Paultre, pou yo te abòde kriz politik la.

Yon lòt kote, pòtpawòl Konsèy Elektoral Pwovizwa a (KEP), Nicole Siméon, fè konnen KEP a pap tann rapò komisyon evalyasyon ak verifikasyon elektoral la pou li pibliye kalandriye a disi fen mwa me a. Madam Siméon fè deklarasyon sa a aprè 3 manm konsèy la te retounen sòti an Repiblik Dominikèn kote yo t al obsève dewoulman eleksyon jeneral yo. Pandanstan, nan sant tabilasyon an, teknisyen yo ap travay 24 sou 24 pou yo verifye pwosè vèbal yo pandan yap fè efò pou yo respekte delè 30 jou yo genyen pou yo renmèt rapò yo bay pouvwa egzekitif la ak KEP a.

Anfen, plizyè kominote nan dyaspora ayisyèn an ap selebre, pandan jounen mèkredi 18 me a, 213èm anivèsè kreyasyon drapo ayisyen an. Oganizatris yon aktivite kap dewoule nan zòn metwopilitèn Washington nan, Toniane Vernet, responsab sèvis kominotè nan Legilz Advantis Horeb nan Maryland, di se yon okazyon pou konpatriyòt yo montre enpòtans eritaj kiltirèl ayisyen an, pou youn manifeste fratènite anvè lòt, epi pataje kèk pla tipikman ayisyen, tankou soup joumou an.

XS
SM
MD
LG