Accessibility links

Ayiti-Politik: Enstalasyon Premye Minis Enex Jean-Charles se pou Lendi 28 Mas 2016 la

  • Ekip Sèvis Kreyòl VOA

Prezidan pwovizwa ayisyen an, Jocelerme Privert, ap enstale nouvo Premye Minis la, Enex Jean-Charles, nan jounen lendi 28 mas 2016 la, swa 3 jou aprè 2 chanm palman an te vote pou apwouve enonse politik jeneral nouvo chèf gouvènman an.

Daprè jounalis e ansyen kandida a la prezidans Clarens Renois, enstalasyon Misye Jean-Charles la se yon devlopman pozitif nan sitiyasyon politik la ann Ayiti kote responsab yo an reta sou divès pwen nan akò ki te mennen Prezidan Privert sou pouvwa a. Si ansyen kandida a rekonèt nouvo Premye Minis la genyen anpil atou ki ka jwe an favè li e pèmèt li jere yon sitiyasyon ki te kapab dejenere an kriz, li menm ak ekip tou nèf kap monte sou pouvwa a genyen anpil travay kap tann yo.

Bò kote pa l, Depite Garry Bodeau, youn nan 2 manm chanm bas la ki te asteni yo --sètadi ki pat vote nan yon sans oubyen yon lòt apre Misye Jean-Charles te prezante enonse politik jeneral li a-- di kèk pati nan enonse a te kite l “endiferan”.

Yon lòt kote, analis politik Frandley Denis Julien panse pi gwo defi kap tann pwochen gouvènman an, se travay komisyon ki pral evalye operasyon elektoral ane pase a ki te bay Jovenel Moise ak Jude Célestin devan nan kous la. Daprè Denis Julien, telman gen mezantant sou fason pou komisyon an fè travay li, li posib pou kontwovès travay sa a ap pwovoke, lakoz yon lòt gouvènman monte sou pouvwa a. Analis la di “sitiyasyon politik la poko fin rezoud ann Ayiti.”

Anfen, nan Jakmèl, yon kandida pou pòs depite sou la banyè PHTK, Dieudonné Lhérisson, byen akeyi le fèt ke peyi a genyen yon nouvo Premye Minis, an palan de Misye Enex Jean-Charles. Sepandan, li gen dout nouvo gouvèmnman an pral kapab respekte tout pwen ki nan akò pouvwa egzekitif la ak 2 branch palman an te siyen nan kòmansman mwa fevriye pase a.

XS
SM
MD
LG