Ann Ayiti, Prezidan pwovizwa Jocelerme Privert, mande diferan enstitisyon konsène yo ranplase reprezantan yo nan Konsèy Elektoral Pwovizwa a nan kad fòmasyon yon nouvo KEP pou konplete eleksyon ki te kòmanse nan fen ane 2015 la dapre akò 5 fevriye a. Jounalis Gregory Jean Philippe (repòtè estasyon afilye nou Radyo-Tele Kayayib ki reponn kesyon Jean Robert Philippe), di nou nouvo lidè ayisyen an lanse envitasyon sa a nan moman li kontinye fè konsiltasyon sou chwa yon nouvo Premye Minis.
Lidè kominote ayisyèn nan nan Eta Florid --tankou reprezantan sosyete sivil la-- ankouraje Prezidan Pwovizwa Privert pou l kontinye konsiltasyon yo jiskaske li va fè chwa pwochen chèf gouvènman an. Youn nan lidè sa yo se Pastè Jean Carol Bernardin, ki pale ak korespondan nou Yves Momopremier nan vil Orlando.
Yon lòt kote, yon òganizasyon nan sant peyi d Ayiti mande entèvansyon otorite yo nan moman sòlda Repiblik Dominikèn vle pouse do polisye ayisyen kap siveye aktivite dwàn yo nan yon zòn franch ki sou fwontyè ant 2 peyi yo. Korespondan nou nan Mibalè Jean Christophe Collegue gen reyaksyon yon dirijan òganizasyon sa a.
Anfen, plizyè òganizasyon nan Depatman Sid la denonse move kondisyon prizon sivil yo kote prizonye yo anpile youn sou lòt. Korespondan nou Jean Hernst Eliscar ban nou detay sou dosye sa a.