Accessibility links

Gouvènman Ayisyen an Dekrete Madi 12 Janvye a Kòm Jounen Komemorasyon ak Refleksyon

  • Ekip Sèvis Kreyòl VOA

Pòtoprens 15 janvye 2010-3 jou apre tranbleman-dtè 12 janvye a

Gouvènman ayisyen an dekrete 12 janvye 2016 la kòm jounen komemorasyon ak refleksyon an memwa viktim tranbleman-d-tè 12 janvye 2010 la. Nan okazyon 6èm anivèsè goudougoudou a gouvènman an mande pou drapo a monte demi ma, pou radyo ak televizyon pase pwogram espesyal epi pou tout night club ak lòt kote ki abitye gen banbòch fèmen.

Bò kote pa l, anbasadè ameriken an ann Ayiti, Peter Mulrean, pilbiye yon mesaj espesyal nan memwa plizyè santèn milye viktim katastwòf janvye 2010 la tandiske plizyè milye sinistre deplore kondisyon yap viv anba tant 6 ane apre kataklis la ki te afekte 3 depatman ak plizyè lòt vil Ayiti.

Sou plan politik, Depite ayisyen yo vote Cholzer Chancy (AAA) kòm nouvo prezidan chanm Bas la nan yon eleksyon ki te mete l fas a Depite Petionvil la Jerry Tardieu. Vòt sa a rive avan 14 senatè eli te prete sèman p andan nan nwit lendi 11 janvye a. Senatè yo gen pou nonmen yon nouvo prezidan avan dewoulman asanble nasyonal la ki te dwe fèt lendi 11 janvye a.

Anfen, Konsèy Elektoral Pwovizwa a pwomèt l ap respekte tout rekòmandasyon ki nan rapò komisyon evalyasyon elektoral endepadan an. Konsènan pase men ki ta dwe fèt nan enstitisyon elektoral la, prezidan enstitisyon an, Pierre Louis Opont, ki te rankontre laprès di, se pa responsabilite KEP a pou l ranplase manm yo.
Msye Opont konfime eleksyon yo ap dewoule 24 janvye, jan dekrè prezidansyèl la prevwa l ak 2 kandida ki te fini an premyè pozisyon nan eleksyon prezidansyèl 25 oktòb la-- kandida PHTK a, Jovenel Moise ak kandida LAPEH a, Jude Celestin. Selon msye Opont pèp ayisyen an ap konnen non nouvo prezidan an 1 Fevriye 2016.

XS
SM
MD
LG