Accessibility links

Breaking News

Ayiti-Prezidansyèl : Jude Célestin Rejte Lide yon Rankont nan KEP a ak Jovenel Moise


Ann Ayiti, kandida a la prezidans Jude Célestin (LAPEH), ki ta sipoze patisipe nan 2èm tou prezidansyèl yo avèk kandida pati ki sou pouwva a (PHTK) Jovenel Moise, voye bay prezidan Konsèy Elektoral Pwovizwa a (KEP), Pierre-Louis Opont, yon lèt kote Misye Célestin refize yon envitasyon nan yon rankont ak Misye Moise nan biwo prezidan KEP a. Envitasyon an te fikse rankont la pou jounen mèkredi 2 desanm 2015 la. Nan lèt sa a, kandida LAPEH a di kondisyon yo pa reyini pou li menm ak kòlèg li yo nan Gwoup G-8 la ankouraje yon demach konsa. Nap raple Gwoup G-8 la se platfòm ki gen ladan n Misye Célestin ak 7 ansyen kandida a la prezidans ki egzije fòmasyon yon komisyon endepandan pou re-evalye resilta eleksyon prezidansyèl 25 oktòb pase a. Devan refi KEP a pou satisfè demand sa a, G-8 la mande fòmasyon yon gouvènman tranzisyon ki tap genyen 2 zan (24 mwa) pou l òganize eleksyon jeneral.

---------------------------------------------

please wait

No media source currently available

0:00 0:05:26 0:00

Ansyen kandida a la prezidans e lidè OPL (Oganizasyon Pèp kap Lite), pwofesè Sauveur Pierre-Etienne, te gen pou l konparèt nan tribunal nan jounen madi premye desanm 2015 la, pou l reponn akizasyon deske li ta komèt difamasyon kont Madam Anne Valérie Milfort, sekretè Prezidan Michel Martelly. Anpil manm G-8 la te prezan nan tribinal la pou yo pote apui moral yo bay Misye Pierre-Etienne. Akize a te gen kòm defansè yon lòt ansyen kandida a la prezidans, Mèt Samuel Madistin, ki mande pou jij la rekize tèt li, sètadi pou l rekonèt gen rezon pou se pa li ki prezide pwosè a. Nap suiv.

----------------------------------------------

Direktè jeneral Radyo-Tele Kiskeya, Marvel Dandin, denonse zak bandi ame moun pa idantifye, ki te tire sou lokal estasyon an nannuit lendi 30 novanm pou leve madi premye desanm 2015 la. Responsab radyo a depoze yon plent devan lajistis e yo mande pou otorite yo ouvè yon ankèt sou sa k pase a. Nouvèl yo fè konnen divès pèsonalite -pami yo genyen kandida a la prezidans Jude Célestin- te fè yon vizit nan Radyo Kiskeya nan jounen madi a pou yo manifeste solidarite yo avèk estasyon an.

---------------------------------------------------

Anbasadris peyi Lafrans nan Pòtoprens, Elizabeth Béton-Delègue, bay pozisyon li sou enpas elektoral la ann Ayiti. Pandan diplomat la tap patisipe nan yon konferans-deba nan Gonayiv nan jounen madi premye desanm nan, li deklare:

“Prensip demokratik yo mande pou se eleksyon ki chanje dirijan yon peyi.”

Madam Béton-Delègue pwofite pasaj li nan Site Endepandans la pou li vizite enstalasyon branch Alliance Française la nan vil sa a.

XS
SM
MD
LG