Accessibility links

12 Oktòb, Jou Dekouvèt Lamerik – Ki Sans Jounen Sa a?

  • Ekip Sèvis Kreyòl VOA

Imaj sa a montre Kritòf Kolon nan youn nan 3 bato li yo, La Santa Marìa,.

Ozetazini, 2èm lendi nan mwa doktòb la se toujou Jou Kristòf Kolon -oubyen jou anivèsè Dekouvèt Lamerik. Se yon jou ameriken mete sou kote pou yo onore Kristòf Kolon ak eksplwa sa a li te reyalize nan mitan Mwayen Aj la. Si pou anpil moun « dekouvèt Lamerik » se yon rezon fyète, depi kèk tan deja genyen kèk gwoup ki panse arive Ewopeyen yo nan sa ki rele "nouvo mond la" sete kòmansman anpil mizè pou pèp natif-natal kontinan an, se sous anpil kontwovès sou sa dekouvèt la reprezante vrèman. Pou ameriken John Viola, prezidan Fondasyon Nasyonal Amerikano-Italyen, siyifikasyon jou ferye sa a varye. Zansèt Misye Viola yo se moun peyi Itali, menm jan ak Kristòf Kolon. Misye Viola deklare:

"Se yon okazyon, se yon jou ferye kote nou kapab selebre kontribisyon nou men, Italyen pote bay peyi sa a. Se yon akazyon pou n selebre istwa nou ak zansèt nou. Mwen panse pou rès peyi a, Jou Kristof Kolon an se yon jounen kote nou selebre peyi sa a kòm yon peyi imigran."

Menm si anpil moun panse Kristòf Kolon sete yon gran eskploratè, gen lòt ki pa kontan ditou ak eritaj li kite dèyè a. Daprè Joe Geneti-Pilawa, pwofesè istwa nan Inivèsite George Mason nan pati nò Eta Vijini, tou prè vil Washington, D.C., Kolon ak navigatè ki te vini avèk li yo te mete nan lesklavaj anpil nan pèp natif-natal yo te jwenn nan nouvo mond la. Pwofesè Geneti-Pilawa di:

" Nan 10 zan -sòti nan ane 1492 pou rive nan ane 1502- kalkil nou fè montre ke popilasyon pèp Tayno a (sètadi endyen natif-natal ki tap viv nan zile Bahamas yo) te sòti nan anviwon yon milyon moun pou l desann rive nan 500 sèlman."

An tou ka, depi kèk ane deja plizyè gwoup endyen natif-natal Ozetazini (sa yo rele « premye nasyon an ») chwazi jounen Kristòf Kolon an pou yo selebre eritaj yo; e kantite a ap ogmante ane apre ane. Kèk obsèvatè panse yo ta dwe chanje non an pou rele fèt la "Jou Pèp Endijèn yo", tandiske kèk lòt panse pèp natif-natal Lèzetazini yo ta dwe chwazi yon lòt jou pou yo onore zansèt yo, kilti yo ak sivilizasyon yo.

XS
SM
MD
LG