Accessibility links

Ayiti-Eleksyon: BEK yo ap Pare Piblikasyon Lis Kandida pou Kolektivite Teritoryal yo

  • Ekip Sèvis Kreyòl VOA

CEP LOGO

Ann Ayiti, Pòtpawòl Konsèy Elektoral Pwovizwa a (KEP), Frantz Bernadin, prezante chif yo pou kantite kandida ki enskri pou patisipe nan eleksyon minisipal ak lokal yo.

Yon lòt kote, senatè Sidès la, Edo Zenny, kandida a la prezidans ki pran kanè nan men Konsèy Elektoral la, fè konnen li prale devan la jistis pou fòse KEP a retounen li nan kous la, dapre anons li fè nan yon rankont ak laprès. Senatè a fè deklarasyon sa a san prezans 2 lòt kandida konsèy la ekate tou, ansyen Premye Minis Laurent Salvador Lamothe ak Anthony Benett, ki te anonse patisipasyon yo nan konferans pou laprès la.

Ayiti-Eleksyon toujou: Senatè Nò a, Wesner Polycarpe, kritike desizyon gouvènman an pran pou l mete an disponibilite anplwaye administrasyon piblik la ki kandida pou patisipe nan pwochèn eleksyon yo san yo pa demisyone. Korespondan nou Orpha Dessources di nou senatè a kwè desizyon sa a vyole konstitisyon peyi a ak dekrè elektoral la.

Anfen, yon depite ameriken ki gen orijin ayisyèn, madam Daphnée Campbel, ak plizyè militan nan Eta Florid, manifeste devan konsila Repiblik Dominikèn nan nan Miami pou yo pwoteste kont desizyon gouvènman Santo Domingo a pran pou l ekspilse plizyè santèn milye ayisyen k ap viv nan peyi a san dokiman legal; desizyon sa a konsène plizyè jenerasyon ayisyen ou desandan ayisyen depi ane 1929.

XS
SM
MD
LG