Accessibility links

Opinyon Minis defans Lèzetazini an, Ashton Carter, sou Sitiyasyon an nan Yemèn

  • Ekip Sèvis Kreyòl VOA

Minis Defans Ashton Carter ap bay lanmen avèk Premye Minis japonè a, Shinzo Abe, nan kòmansman rankont yo nan rezidans ofisyèl chèf gouvènman an nan Tokyo.(Foto: AP/Franck Robichon, Pool, Mèkredi 8 avril 2015).

Minis defans Lèzetazini an, Ashton Carter --kap vizite peyi Japon-- pale nan kòmansman jounen mèkredi 8 avril 2014 la pou l di branch rezo teworis al-Kayda a nan Yemèn ap pwofite de goumen kap dewoule ant rebèl Houti-yo ak fòs gouvènmantal yo pou l sezi kèk gwo pòsyon nan teritwa peyi a, yon peyi kap goumen pou stabilite depi ansyen lidè li a te oblije kite pouvwa a an 2012.

Pandan Misye Carter tap pale ak laprès nan Tokyo, li fè konnen kriz kap devlope nan Yemèn nan fè efò Lèzetazini ap fè pou l konbat aktivite al-Kayda sou Preskil Arabik la, vin pi difisil; paske, daprè li, operasyon konsa fèt pi fasilman nan yon rejyon kote gouvènman yo genyen stabilite. Minis defans ameriken an di:

« Menas teworis branch al-Kayda sou Preskil Arabik la poze pou peyi oksidantal yo (san bliye Lèzetazini), se yon menas ki la lontan e ki trè serye. Nou pral kontinye konbat menas sa a. Natirèlman, nou pral chanje taktik nou itilize pou sa, paske nap adapte l ak sikonstans yo. Nou espere lòd ak stabilite va retounen nan Yemèn, non sèlman pou rezon nou sòt di la a, men paske gen anpil moun kap soufri nan peyi sa a nan moman batay yo ak kontinye ak diferan group belijeran kap monte-desann nan Yemèn. »

Misye Ashton Carter kontinye pou l di Lèzetazini ap mete ala dispozisyon Arabi Sawoudit enfòmasyon sekrè ak rapò enfòmatik li gen sou sa kap pase sou teren an nan Yemèn, yon fason pou l ede kowalisyon Sawoudyen yo ap dirije nan lit kont rebèl Houti yo. Nan jounen madi 7 avril la, Asistan Sekretè defans ameriken an, Antony Blinken, te fè konnen Lèzetazini ap akselere tou livrezon zam lap bay kowalisyon an.

XS
SM
MD
LG