Accessibility links

In Memoriam : Mario Cuomo

  • Ekip Sèvis Kreyòl VOA

Ansyen gouvènè Eta New York Mario Cuomo pandan li tap selebre ak pitit-gason li, Andrew, apre Cuomo Fis te ranpòte re-eleksyon kòm gouvènè eta a. Foto: 4 novanm 2014).

Prezidan Obama ak madanm li, Michelle, rann omaj pou ansyen gouvènè New York, Mario Cuomo, ki mouri jedi premye janvye 2015 la, jou kote pitit-gason n, Andrew, prete sèman pou yon 2èm manda kòm gouvènè eta a. Cuomo Père te genyen 82 zan. Mario Cuomo te sou pwogram pou l pran lapawòl nan seremoni prestasyon sèman an; sepandan li pat kapab prezante akoz maladi.

Koup prezidansyèl ameriken an pote-kole ak yon kantite lòt vwa moun pa ka konte pou yo prezante kondoleyans yo bay lafanmi Cuomo. Nan yon deklarasyon prezidan Obama fè parèt nan sikonstans la, li di Misye Cuomo te reprezante yon vwa ki tap defann tolerans ak diyite.

Nan konvansyon Pati Demokrat la te òganize an 1992, swa anvan eleksyon ki te mennen Bill Clinton sou pouvwa, obsèvatè yo te ka gen yon ide sou talan Mario Cuomo te genyen pou l kenbe atansyon yon piblik. Li te rete sou podyòm nan pou l di:

“Se swa nou reyisi nou tout ansanm, oubyen pap gen yon peyi ki rele Lèzetazini ankò, avèk tout gwo talan, tout bèl kado Bondye bay nasyon beni sa a.”

Nan menm konvansyon an ki te dewoule aprè 12 zan peyi a te pase sou administrasyon 2 prezidan repibliken --Ronald Reagan (8 tan) ak George W. H. Bush (4 tran)-- Mario Cuomo te deklare:

“Aprè 3 manda sou pouvwa a, zòt te genyen fèt pa yo deja; zòt te genyen parad ak defile pa yo deja. Li lè, li tan pou yo al fè wout yo (an angle: “It is time for them to go.”)

Defen Cuomo te domine sèn politik la nan Eta New York sòti nan ane 1983 pou rive nan ane 1994. Li te vin gen yon renome nasyonal ak entènasyonal gras ak “l’art oratoire” li, yon renome moun pat ka prevwa lè yo konsidere li te fèt nan yon fanmi ki pat tèlman gen lajan.

Gouvènè Cuomo Père pase nan liswa Lèzetazini --tankou prezidan Obama di l la-- kòm yon defansè sosyal ki tap reklame jistis pou tout moun. Sete yon manm fawouch Pati Demokrat la; e plizyè fwa li te pase lontan ap reflechi pou l konnen si l te dwe poze kandidati li pou plas prezidan Lèzetazini.

XS
SM
MD
LG