Ann Ayiti, Prezidan Michel Martelly ap pare l pou l reprann seri konsiltasyon yo avèk aktè sosyo/politik yo nan yon jefò pou soti peyi a nan kriz politik l ap travèse depi plis pase 3an. Msye Martelly fè konnen l ap mete yon mesaj final devan pèp ayisyen an 18 novanm apre li finn revize, ansanm ak konseye l yo, pwopozisyon diferan sektè pwopozisyon yo fè l sou fason yo kwè kriz la kapab rezoud. Sou kesyon eleksyon yo, lidè ayisyen an deklare l ap pran yon desizyon final apre 12 janvye 2015- dat palman an ap disfonksyonèl akoz manda 2ièm tyè sena a k ap ekspire.
Yon lòt kote, msye Martelly tonbe anba anpil kritik apre intèviou li bay 3 jounalis franse nan vil Paris pandan vizit li sot fè sou kontinan ewopeyen an kote li rankontre chanselye alman an, Angela Merkel, e ak prezidan franse a François Hollande. Plizyè sektè kritike chè leta ayisyen an, yo di, ki pat byen prepare pou l reponn kesyon jounalis yo.