Accessibility links

Pwogrè Lit kont Epidemi Ebola ann Afrik de Lwès

  • Ekip Sèvis Kreyòl VOA

Anbasadè Lèzetazini nan l'ONU, Samantha Power, ki tap patisipe nan yon panèl diskisyon sou tit "Kriz Ebola a: Kijan li te Parèt e Kisa ou Dwe Konnen" (Foto: REUTERS/Andrew Kelly -- New York).

Anbasadè Lèzetazini nan Nasyonzuni an, Samantha Power, fè konnen gen kèk siyn pozitif ki parèt nan 3 peyi Afrik de Lwès ki plis sibi konsekans epidemi ebola a e ki montre responsab lasante peyi sa yo ap fin pa kontwole malady a.

Diplomat ameriken an, ki te parèt nan pwogram televizyon CBS, Face the Nation, deklare gras a prezans espesyalis ki sòti nan Sant Kontwòl ak Prevansyon Maladi Etazini an, CDC, ak manm lame amerikèn nan, gen yon ogmantasyon 90 pou san nan kantite antèman ki fèt yon fason ki respekte kondisyon ki elimine danje sa te poze pou moun nan kapital Liberya a, Monrovya.

Madam Power ajoute to antèman ki pa poze danje e ki fèt 24 trè apre lanmò yon viktim, monte rive kounye a a preske 100 pou san nan Syera Leyòn. Daprè CDC, plis pase 70 pou san nan nouvo ka enfeksyon Ebola, rive pandan dewoulman antèman moun ki mouri anba maladi a; sa fèt akoz likid kap sòti nan kò mò a toujou gen viris la. Pandan patisipasyon Anbasadè Power nan pwogram CBS la, li deklare:

Mwen ta renmen repete youn nan bagay mwen te tande lè m te laba a; sè ke moun yo te kontan onnpepli lè yo te wè Prezidan Obama ki tap anbrase Nina Pham, yon enfimyè ki te trape maladi ebola a nan Lopital Presbiteryèn Tegzas la nan Dallas, e ki pa gen maladi a ankò. Youn nan mesaj mwen te tande, se yon mesaj ki di: “Nou vle pou lemond antye anbrase nou, menm jan Prezidan Obama anbrase Nina Pham nan. Jounen jodi a, se Lèzetazini kap anbrase nou aktivman; men lòt peyi yo ta dwe fè menmman, parèyman...”

Lè yo poze Anbasadè Power kesyon sou desizyon Kanada pran pou l mete entèdiksyon sou vwayajè kap sòti nan Afrik de Lwès yo, li reponn Administrasyon Obama a kwè gen yon pi bon fason pou kenbe pèp ameriken an an sekirite: se abòde pwoblèm nan nan sous li, ogmante vwayaj sitwayen ameriken kap pote swen sante bay moun nan Afrik de Lwès, e fasilite deplasman lòt vwayajè ki kapab pote konkou yo nan rejyon an.

XS
SM
MD
LG