Accessibility links

Reyaksyon sou Rapò Depatman Deta sou Sitiyasyon Dwamoun ann Ayiti

  • Ekip Sèvis Kreyòl VOA

Lady Justice
Reyaksyon tonbe nan Pòtoprens sou dènye rapò Biwo Demokrasi, Dwamoun ak Travay nan Depatman Deta ameriken ki prezante yon bilan sou sitiyasyon dwamoun ak sistèm jistis la nan peyi Dayiti pou ane 2013 la.

Pou Pierre Espérance, lidè RNDDH (Rezon Nasyonal Defans Dwamoun ann Ayiti), gen pwogrè ki fèt nan fason lapolis ap fè travay li nan peyi a –jan rapò a di sa a; sepandan, daprè Misye Espérance, sistèm jidisyè a pap fonksyone kòmsadwa, akoz enpinite, koripsyon ak sa li konsidere kòm yon ensekirite jidisyè kote moun pase twòp tan nan prizon san yo pa pase devan jij natirèl yo.

Minis jistis ayisyen an, Jean Renel Sanon, bò kote pa l, fè konnen gen pwogrè ki fèt nan plan gouvènman an genyen pou l konstwi plis prizon nan peyi a nan kad batay kont detansyon prevantif pwolonje. Minis Sanon di Lavwdlamerik, li konsyan sitiyasyon an mande chanjman e li mande lanse apèl bay tout aktè ki enplike nan fonksyonnman sistèm jidisyè a pou yo fè efò pou kore travay kap fèt pou pote amelyorasyon ki nesesè yo.

Anfen Carl Jean-Louis, direktè kabinè Premye Minis ayisyen an Laurent Lamothe, anonse gouvènman an pral pibliye yon dokiman pou kontre-kare rapò a. Misye Jean-Louis fè konnen moun ki prepare rapò sa a ta dwe vini ak prèv pou montre byenfonde sa k di nan tèks Biwo Demokrasi, Dwamoun ak Travay Depatman Deta a mete deyò a.

Klike sou sou “Koute” pou w tande yon repòtaj Sèvis Kreyòl VOA sou reyaksyon rapò Depatman Deta a pwovoke ann Ayiti.
XS
SM
MD
LG