Accessibility links

Fèmti Gouvènman Ameriken an Rive sou 7èm Jou li

  • Ekip Sèvis Kreyòl VOA

Ozetazini, nan moman yon fèmti pasyèl gouvènman an antre nan 2èm semèn li, pati rival yo nan Kongrè a rete kanpe tòf sou pozisyon yo, e kesyon pou konnen ki lè gouvènman federal la pral gen otorite pou l rekòmanse fè depans, se yon kesyon ki rete poze.

Lidè politik yo ak ekonomis yo atire atansyon sou konsekans grav sa kapab genyen pou peyi a e menm pou lemond, si pati konsène yo kontinye rete sou pozisyon yo rive jous 17 oktòb 2013 la, dat kote gouvènman an pap gen kòb a la dispozisyon l pou l peye dèt Lèzetazini –yon bagay ki tap rive pou la premyè fwa nan tout istwa peyi a. Sepandan, prezidan Chanm Depite a, Republiken John Boehner --ki tap abòde dosye a dimanch sou chèn televizyon ABC-- pale pou l fè konprann pati li- a ka asoupli pozisyon l yon jan pou sa pa rive.

Misye Boehner di : “Mwen pa vle Lèzetazini tounen yon kliyan delenkan ki pa peye dèt li; men mwen pa pral ogmante plafon dèt la san nou pa fè kèk konvèsasyon serye sou fason pou n fè fas ak vrè pwoblèm ki lakoz dèt la pa sispann ogmante.”

Misye Boehner akize Prezidan Barack Obama deske li refize fè chita-tande ak Repibliken yo sou kèk pwopozisyon yo fè sou mwayen pou yo redui depans Leta Federal la. Bò kote pa l, Prezidan Obama akize Misye Boehner ak yon ti gwoup palmantè konsèvatè deske se yo ki kreye kriz la, paske yo bloke nan Chanm Bas la yon vòt sou bidjè nasyonal la ki ta kapab mete fen nan fèmti gouvènman an. Misye Obama repete pozisyon sa a nan yon entèvyou li bay ajans nouvèl The Associated Press.

Prezidan Obama di : “Mwen pare a 100 pou san pou m parye sou le fèt ke genyen ase vwa nan Chanm dè Reprezantan an, nan moman nap pale la a, pou n asire nou ke Lèzetazini pa tounen yon peyi ki pa ka peye dèt li.”

Prezidan Obama kontinye pou l di Kongrè a pa kapab refize otorize depans pou lajan li deja pran angajman pou l depanse.

“Mwen pap negosye sou responsablite Kongrè a genyen pou l onore bodwo li deja resevwa. Mwen pap pèmèt pèsonn moun lakoz yo trennen nan labou bòn repitasyon Lèzetazini kòm yon peyi ki respekte angajman li, paske tou senpleman gen moun ki poko vle aksepte rezilta eleksyon an, oubyen ki vle make kèk pwen ideyolojik.”

Misye Obama fini pa di kalte batay politik sa a ant Demokrat ak Repibliken --yon batay kap mennen peyi a de kriz an kriz-- se pa yon bon bagay pou ekonomi amerikèn nan.
XS
SM
MD
LG