Accessibility links

Breaking News

Fèmti Gouvènman Ameriken an Rive sou 2èm Jounen li


Mèkredi 2 oktòb 2013 la fè 2 jou depi pi fò gouvènman ameriken an sispann travay pou la premyè mwa nan 17 tan, aprè chaken nan 2 chanm Kongrè a te rejte plan lòt la te prezante pou finanse fonksyonnman leta federal la menm tanporèman. Jiska 800 mil fonksyonè piblik pa ale travay, alòske sila ki prezante nan biwo yo ap travay san yo pa konnen ki lè leta pral peye yo.

Prezidan Barack Obama, ki tap abòde sitiyasyon an nan mitan jounen madi premye obtòb la, lage responsablite sitiyasyon sa a kareman sou do lidè repibliken yo nan Kongrè a. Misye Obama te pale konsa nan La Mezon Blanch pandan li tap fè kòmantè sou antre an aplikasyon nouvo lwa sou sistèm swen-sante a ki rele Obamacare.

Nan menm jounen madi a, lidè minorite a nan Chanm dè Reprezantan an, Nancy Pelosi, se youn nan palmantè Demokrat ki rejte yon pwopozisyon-lwa tou nèf Repibiken yo prezante pou yo debloke finanmsan ki ta pèmèt yo relouvri kèk pati sèlman nan sektè piblik la, tankou pak nasyonal yo, mize yo, sèvis leta pou veteran Lagè yo, ak fonksyonnman vil Washington DC.

Lejislasyon sa a pa rive jwenn 2 tyè vwa li te bezwen pou l pase nan Chanm Depite a kote Demokrat yo egzije finansman pou tout sektè nan gouvènman ameriken an. Madam Pelosi, ki reprezante Eta Kalifòni nan Chanm Bas la, deklare:

"Tout sa se fent y ap fè ; se tan nou yap fè n pèdi. Sa pap mennen nou okenn kote. Sa ki nan tèt yo, se pa pak nasyonal yo pyès, se pa mize yo, se pa pwobèm veteran yo, ni fonksynnman Washaington DC. Sa ki nan tèt yo, se lwa sou swen-sante a yo pa vle wè. Yap chwazi ak ti dwèt yo ki sektè nan gouvènman an pou yo ouvè jiskaske yo va rive elimine refòm nan swen-sante a ki bay tout moun yon asirans ki abòdab. Ebyen, nou pap kite sa rive !"

Madi premye obtòb la toujou, Repibliken nan Chanm Depite a vote pou yo rekòmanse negosye ak Sana a sou mwayen pou yo mete fen nan fèmti gouvènman an.

Demokrat yo reponn pou di yo pare pou yo negosye, men se si -e sèlman si- depite yo dispoze apwouve yon lejislasyon ki ouvè tout sektè nan gouvènman an. Bò kote pa l, Prezidan Chanm Depite a, John Boehner --reprezantan Eta Ohio- eseye lage blam nan sou do Demokrat yo pou jwèt ping-ping kap jwe ak lejislasyon sou re-ouvèti sèvis piblik yo.

Misye Boehner di: "Peyi nou an gen gwo pwoblèm. Jounen jodi a, gouvènman nou an gen gwo pwoblèm. Sèl jan pou pwoblèm sa yo rezoud, se pou nou chita ansanm an zanmi ; se pou n sonje pwoblèm pèp ameriken an epi chache jwenn yon antant. "

Malgre fèmti gouvènman ameriken an, manm lame Lèzetazini yo ap kontinye travay e operasyon militè yo, tankou sa kap dewoule nan peyi Afganistan yo, ap rapouswiv san kanpe.

Lidè Repibliken nan Kongrè a te makònen tout adopsyon yon nouvo bidjè pou gouvènman an avèk eliminasyon lwa sou swen-sante a, Obamacare la. Men, malgre tout efò yo pou yo bloke aplikasyon lwa a, Obamacare la antre ann efè madi premye oktòb 2013 la. Daprè chif ofisyèl yo, anvan 7 tè di maten jou sa a plis pase yon milyon moun ki pa gen asirans sante te deja enskri sou entènèt la.
XS
SM
MD
LG