Accessibility links

Prezidan Obama nan l’ONU: « Kominote Entènasyonal la Dwe Leve Kanpe kont Teworism »

  • Ekip Sèvis Kreyòl VOA

Prezidan Barack Obama, ki pran lapawòl madi nan ouvèti 68èm sesyon Asanble Jeneral Oganizasyon Nasyozini an nan New York, deklare li pare pou l pran aksyon dirèk pou l defann Lèzetazini kont atak teworis epi itilize tout mwayen li gen a la dispozisyon li –san bliye lafòs militè, si sa nesesè-- pou l defann enterè peyi a nan Mwayen Oryan an ak Afrik di Nò.

Misye Obama –ki tap pale ak lidè mondyal yo nan katye jeneral l’ONU an-- kontinye pou l di si Siri, ooubyen nenpòt ki lòt peyi, itilize zam chimik, fòk yo sibi konsekans yo, paske, daprè li, sa mete an je kredibilite lemond. Prezidan Obama di:

"Nou byen konnen ke, pou kòmanse, kominote entènasyonal la fèt pou fè peyi yo respekte konvansyon sou entèdiksyon zam chimik yo. Lè m te di mwen deside ak tout fòs pase lòd pou nou lanse yon atak kont rejim Assad la nan Siri poutèt li te itilize zam chimik, mwen pat pran desizyon sa a san m pat byen kalkile davans. Mwen te pran desizyon an paske mwen te byen konnen sekirite nasyonal Lèzetazini te an je, e sekirite mondyal la menm te an je."

Misye Obama kontinye pou l abòde, antwòt, dosye politik Lèzetazini vizavi Mwayen Oryan an ak Afrik di Nò. Sou pwen sa a, li deklare : "Kite m sezi okazyon an pou m detaye sa k reprezante politik Lèzetazini vizavi Mwayen Oryan an ak Lafrik di Nò, e sa k pral reprezante politik nou pandan rès manda m nan. Lèzetazini d Amerik pare pou l itilize tout mwayen ki nesesè –san bliye lafòs militè- pou l defann enterè prensipal li yo nan rejyon sa a."

Prezidan Barack Obama te pale maten an pandan plis pase 40 minut devan Asanble Jeneral Oganizasyon Nasyon Zini an kap òganize 68èm sesyon li.
XS
SM
MD
LG