Accessibility links

Yon Atak nan yon Baz Naval tou pre Washington Kontinye Pwovoke Kesyon

  • Ekip Sèvis Kreyòl VOA

Ozetazini, otorite yo ap poze kesyon pou mande kouman fè yon anplwaye ki tap tavay sou kontra sèlman (e ki te yon dosye ki te montre li se yon moun vyolan ak pwoblèm mantal) te jwenn otorizasyon pou l antre sou yon baz La Marin de Gè Lèzetazini an nan Washington kote li touye 12 moun lendi 16 novanm 2013 la anvan lapolis te fin pa elimine li. Non atakan sa a se Aaron Alexis e li te genyen 34 tran.

Daprè sous lapolis, otorite yo pa rive jwenn okenn rezon ki te pouse misye fèmen je l pou l ouvè kout zam sou moun ki tap travay nan Navy Yard, ki se katye jeneral Marin de Gè a nan Washington. Menm sous la ajoute yo pa jwenn okenn prèv non plis ki ta fè wè Aaron Alexis te genyen yon koneksyon kèlkonk ak yon mouvman teworis entènasyonal, ni okenn motivasyon politik ou relijye pou l te poze zak la.

Nouvèl la fini pa di atakan an te gen otorizasyon pou l antre sou baz naval la, malgre li te gen afè ak lajistis 2 fwa nan le pase, epi dosye li montre misye te konn gen alisinasyon --pi presizeman li te konn tande vwa imajinè. Depi mwa dout pase a, li te konn ale regilyèman nan Lopital Veteran Lagè yo pou doktè te swaye li pou pwoblèm mantal.

Madi 17 septanm nan, senatè ameriken yo te òganize yon seremoni kote yo te fè yon priyè epi obsève yon moman silans pou viktim yo. Aprè sa, minis defans ameriken an, Chuck Hagel, kòmandan Wo Eta Majò Lame amerikèn nan, Jeneral Martin Dempsey, delege vil Washinton, D.C. nan Kongrè a, Eleonor Holmes Norton, majistra kominal Washington nan, Vincent Grey, ak divès lòt ofisyèl te depoze yon jèb flè devan Moniman Marin de Gè a nan lonè tout fanm ak gason ki pèdi lavi yo nan atak la.
XS
SM
MD
LG