Accessibility links

Breaking News

Larisi Mande Siri Kowopere ak Enspektè Entènasyonal yo


Larisi lanse apèl bay alye li, peyi Siri, pou mande l kolaborae ak enspektè l’ONU ki nan peyi a pou mennen ankèt sou swadizan itilizasyon zam chimik nan lagè sivil la –zam chimik lame siryèn nan ta itilize nan atak li lanse sou kèk katye nan Damas, kapital la, Damas, nan mitan semèn nan.

Daprè yon deklarasyon ki sòti nan Depatman Afè Etranjè ris la vandredi 23 out 20l3 la, minis afè etranjè Sergei Lavroff te gen avèk kòlèg ameriken li, John Kerry, yon apèl telefonik kote yo mete yo dakò sou le fèt ke akizasyon opozisyon an nan Siri lanse pou di lame te itilize zam chimik, se yon akizasyon ki merite pou yo mennen yon ankèt total e san pati-pri sou li.

Nan menm deklarasyon an, Larisi fè konnen rebèl ki an fas gouvènman Prezidan Bashar al-Assad la fèt pou kite enspektè l’ONU yo antre-sòti san pwoblèm nan zòn ki anba kontwòl yo.

Toujou sou sitiyasyon nan peyi Siri, divès ajans Oganizasyon Nasyon Zini k ap travay sou pwoblèm timoun ak refijye fè konnen kantite timoun ki oblije kite kay yo pou yo chape anba vyolans nan Siri, monte rive yon milyon nan jounen vandredi a, tandiske genyen 2 lòt milyon timoun kap viv nan zòn fwontyè peyi a.

Vrèmanvre, UNICEF (Ajans Nasyon Zini pou Timoun) avèk Wo Komisarya l’ONU pou Refijye a deklare anpil nan timoun siryen yo al pran refij nan peyi vwazen tankou La Jòdani, Tiki, Irak ak Ejip, e menm nan peyi ki nan pati nò kontinan afriken an ak peyi ewopeyen yo. Jana, yon timoun ki deplase kite kay li pou l al viv nan yon kan nan vil Damas, kapital Siri, di Lavwadlamerik kisa li ta renmen.

Jana di : "Tout sa m swete, se pou Siri tounen yon peyi ki gen lapè ankò. Tout sa m vle, se pou pwoblèm yo sispann. Nan epòk sa a ane pwochèn, mwen espere tout bagay va retounen nan nòmal yo, nan jan yo te ye anvan an."

Ajans l’ONU yo di timoun refijye yo ap fè fas ak divès kalte danje, tankou travay nan move kondisyon san yo pa peye yo, eksplwatasyon seksyèl avèk maryaj anvan yo gen laj pou sa.
XS
SM
MD
LG