Accessibility links

Vizit yon Semèn Pap François nan Peyi Brezil


Pelren ki tap danse e chante sou Plaj Copacabana, nan Rio de Janeiro, anvan Pap François vizite vil la.

Pap François pral kòmanse, lendi 22 jiyè a, yon vizit yon semèn o Brezil –peyi ki genyen pi gwo popilasyon katolik la nan lemond, e kote otorite yo te gen pou fè fas ak yon seri pwotestasyon anti-gouvènmantal nan semèn ki pase yo.

Souvren Pontif la, ki gen 76 zan, kite Wòm nan mitan jounen lendi a, avèk yon avètisman kote li fè konnen lemond ap kreye yon jenerasyon jenès ki pèdi nan chomaj alòske, an menm tan, lap izole granmoun aje yo. Se premye vwayaj pap la aletranje depi li te tounen 266èm chèf Legliz Katolik Womèn nan mwa mas pase a. Se premye pap ki sòti nan Amerik yo.

Pandan Pap François nan avyon an, li di jounalis yo li genyen gwo kè-sote poutèt lemond, avèk yon gwo to chomaj pami jèn yo, « ap kouri risk pou l genyen yon jenerasyon san travay », menm si li di travay bay diyite. Chèf Legliz Katolik la kontinye pou l kritike sa li rele « yon kilti ki rejte granmoun aje yo », paske, daprè li, « moun pa ta dwe voye granmoun aje yo jete nan yon seri de kilti ki konsantre sou tout bagay ki nouvo. »

Nan youn nan seremoni ki sou pwogram ki prepare pou resevwa Souvren Pontif la, plis pase yon milyon jèn brezilyen pral rasanble nan vil Rio de Janeiro pou yo selebre nouvo pap la. Pwogram vizit sa a genyen ladan n tou kèk rankont ak lidè lokal, rejyonal e nasyonal yo o Brezil, mete sou yon seri de aktivite kap gen rapò avèk selebrasyon Jounen Mondyal Jenès la jedi 25 jiyè kap vini la-a.

Pwogram nan prevwa tou yon rankont ak yon gwoup prizonye nan vil Rio, plis yon vizit nan yon bidonvil kote lapolis ak lame te lanse divès operasyon, nan kòmansman ane 2013 la, pou yo te desitire trafikan dwòg. Se konsa tou, pap la pral inogire, nan yon lopital nan Rio, yon paviyon pou tretman moun ki esklav dwòg e li gen pou l priye nan yon chapèl ki pote non Notre Dame Aparecida, ki se Sent Patwòn peyi Brezil

Yon jèn pèlren brezilyen, ki rele Matheus Fernandes e ki tap fè kòmantè sou vizit pap la, deklare :

“Se yon moman espesyal pou Legliz, pou le mond e sitou pou mond katolik la, lè nou rankontre pou nou priye, pou nou manifeste lafwa nou, rafèmi fwa nou, alimante esperans nou epi manifeste lacharite. »

Yon afè de 10 mil polisye mete sou plis pase 14 mil sòlda ap sou plas pou asire pwoteksyon Pap François pandan vizit sa a –yon bagay ki reprezante yon veritab defi pou otorite brezilyen yo sou plan sekirite a. Nan tèt ekip kap asire sekirite pap la, genyen jeneral José Abreu, kòmandan lame de tè brezilyèn nan. Li pale pou l di kisa ki bay li menm ak mesye l yo plis preokipasyon nan moman yo gen pou asire sekirite Chèf Legliz Katolik Womèn nan. Jeneral Abreu di :

“Narèlman, le fèt ke pap la pap mete sou li yon jilè par-bal, se yon bagay ki ban nou kèsote. Mwen ta pi alèz, si Souvren Pontif la te vini ak yon papamobil bal pa ka pèse. »

Vizit pap la vini nan yon moman kote genyen gwo boulvès sosyal o Brezil –boulvès ki te kòmanse avèk divès mouvman pwotestasyon ki te dewoule nan mwa jen 2013 la kont yon ogmantasyon pri transpò otobis nan vil Sao Paulo. Pwotestasyon sa yo pat pran tan pou yo tounen manifestasyon popilè kote Brezilyen te pran lari pa bann e pa pakèt pou yo denonse depans gouvènman an ap fè pou òganizasyon Koup di Mond Football 2014 la. Manifestasyon yo te fin pa gaye pou yo tounen pwotestasyon kont koripsyon nan mitan gouvènman an.

Pap Francois –ki se yon yon ansyen kadinal peyi Ajantin-- te tounen pap nan kòmansman ane sa a. Prezidan Brezil la, Madam Dilma Roussef, antwòt, ap prezan pou resevwa l nan ayewopò entènasyonal Rio de Janeiro a.
XS
SM
MD
LG