Accessibility links

Breaking News

Brezil: Rankont Dijans Kabinè Ministeryèl la Sou Gwo Mouvman Pwotestasyon yo


O Brezil , gouvènman prezidan Dilma Rousseff la ap òganize yon rankont dijans ak kabinè ministeryèl la pou anvizaje mwayen pou l fè fas ak yon mouvman pwotestasyon ki la depi plizyè jou deja e ki sanble pa vle sispann, malgre gouvènman an aksepte fè anpil konsesyon.

Daprè otorite yo nan Brazilya, se pi gwo mouvman pwotestasyon ki dewoule nan peyi a depi plizyè dizèn dane.

Vrèman vre, yon milyon moun, pou pipiti, te pran lari, nan divès vil atravè peyi a --pami yo genyen 300 mil konsa ki te pran beton an nan vil Rio de Janeiro, kote lapolis te oblije tire kout gaz lakrimojèn pou l mete kontwòl sou foul la.

Se konsa tou, nan menm jounen an, manifestan te pran daso batiman Depatman Afè Etranjè a nan kapital la, Brazilya, kote yo voye anndan lokal la tout sa yo te genyen anba men yo, san bliye koktèl molotov, anvan lapolis te rive mete yo deyò.

Prezidan Rousseff gen pou rankontre ak plizyè manm kabinè ministeryèl la pou l chache konnen ki repons pou l bay manifestan yo. Devan sitiyasyon sa a, Madam Rousseff deside anile yon vwayaj li te gen pou l fè o Japon semèn pwochèn nan.
XS
SM
MD
LG