Accessibility links

Breaking News

Kriz Ekonomik: Bank yo Relouvri Pòt yo sou Lil Chip apre 12 Jou


Yon Chipriyot kenbe nan men l yon postè ki di "Chip, reveye w".
Yon Chipriyot kenbe nan men l yon postè ki di "Chip, reveye w".
Sou Lil Chip, obsèvatè yo prevwa anpil moun pral mete yo nan liyn byen long devan bank yo lè yo ouvri aprè yon fèmti ki dire 12 jou. Bank yo ap rete ouvè pandan 6 zèd-tan sèlman a pati de midi, lè lokal, e kliyan yo ap kapab wete pa plis ke 383 dola nan kont-an-bank-yo pa jou ; tandiske moun kap kite zile a pou y al vizite yon lòt peyi a, kapab wete pa plis ke 3 mil 831 dola. Responsab yo mete gwo limit sa a sou retrè kliyan yo kapab fè, yon fason pou yo evite moun wete yon twò gwo kantite kòb ki ta kapab lakoz sistèm bankè a kraze.

Depi mèkredi swa, sèvis sekirite a te trè sere alantou bank yo, nan moman anplwaye yo tap fè preparasyon pou yo rekòmanse travay. Bank yo sou zile Chip te fèmen depi 16 mas pase a, pandan gouvènman an tap fè negosyasyon pou wè si l te ka jwenn yon prè 13 milya dola nan men vwazen ewopeyen li yo, Bank Santral ewopeyèn nan avèk Fon Monetè Entènasyonal (FMI). Kòm kondisyon pou Chip te resevwa prè sa a, otorite yo te dakò pou yo konfiske 40 pou san (ou plis toujou) nan depo lajan ki pa asire e ki depase 130 mil dola, pou l kapab repeye prè a.

Se konsa tou, antant la mande pou otorite finansye zile a restriktire “La Banque de Chipre”, ki se pi gwo bank ki prete lajan nan peyi a, e yo pral pase men pran kèk nan depo ki fèt nan 2èm bank zile a, an palan de “Banque Populaire de Chipre » ki pral fèmen. Bank santral la revoke direktè jeneral « Banque de Chipre » la, Yiannis Kypri, aprè yo te nonmen yon administratè espesyal pou jere enstitisyon an –yon aksyon ki fè prezidan bank la bay demisyon n. Men konsèy administrasyon an pa aksepte demisyon an.

Aprè Lagrès, Pòtigal, Iland ak Lespay, Chip se 5èm peyi nan « zone euro » a ki te bezwen yon plan sovtaj ekonomik plizyè milya dola pou evite li kriye fayit.
XS
SM
MD
LG