Accessibility links

Yon lòt Avètisman Sekretè Deta John Kerry pou Iran

  • Ekip Sèvis Kreyòl VOA

Sekretè Deta ameriken an, John Kerry, fè konnen kominote entènasyonal la pa pral kontinye negosye pou tout tan ak Iran sou pwogam nikleyè peyi sa a.

Misye Kerry pale konsa lendi 4 mas 2013 la aprè li te debake nan vil Riyad, kapital Arabi Sawoudit, kote li fè chita-tande ak minis afè etranjè a, Prens al-Faisal, ki rekonèt “negosyasyon yo pa kapab kontinye pou toutan.”

Nan menm jounen lendi a, chèf diplomasi amerikèn nan genyen pou l rankontre tou ak prezidan Pouvwa Palestinyen an, Mahmoud Abbas, 2 semèn anvan Misye Kerry akonpaye Prezidan Barack Obama nan yon vizit nan peyi Izrayèl.

Anvan Sekretè Deta a te ale Riyad, li te fè yon eskal dimanch nan Lejip kote li promèt renouvèlman asistans finansye Lèzetazini pou peyi sa a. Se premye vizit Misye Kerry kòm chef diplomasi amerikèn nan yon peyi arab. Pandan yon rankont Sekrete Deta a fè avèk prezidan ejipsyen an, Mohammed Morsi, Lekèr ba li asirans ke nouvo gouvènman an pral aplike refòm ekonomik ak politik pou kore travay kap fèt pou estabilize peyi a ki divize anpil.

Bò kote pa l, Misye Kerry fè konnen Lèzetazini pral bay Lejip 190 milyon dola tousuit kòm premye vèsman yon gwo pwogram asistans 450 milyon dola; se kontribisyon Washingtonnan efò ki sou pye pou estabilize peyi a e ankouraje refòm ekonomik Lejip bezwen tout bon.

Chèf diplomasi amerikèn nan di Washington ap ajoute 60 milyon dola ki pral sèvi nan yon nouvo fon pou antrepriz ki apiye jèn entreprenè ak envestisè ejipsyen yo.
XS
SM
MD
LG