Accessibility links

Kanpay Elektoral la Ozetazini Rive nan Bout li

  • Ekip Sèvis Kreyòl VOA

Ozetazini, kanpay elektoral manch long pou plas prezidan an kote 2 kandida Demokrat Barack Obama ak Repibliken Mitt Romney, livre yon konba san pran souf pou wè kilès nan 2 a ki pral pase 4 pwochen ane yo nan La Mezon Blanch, rive nan fen li lendi 5 novanm 2012 la.

Nan dènye jou kanpay la, 2 kandida yo pral vizite divès eta nan kad dènye tantativ yap fè pou wè si yo v a fè yon diferans nan entansyon vòt elektè yo, aloske majorite sondaj yo montre kous la sere anpil-anpil.

Sou 50 eta ameriken yo, se sèlman nan yon ti ponyen nou jwenn chans kandida yo pratikman egal-ego. Pa egzanp, Eta Florid, ki nan pati sidès peyi a, se youn nan eta kote sondaj yo montre okenn nan 2 kandida yo pa genyen yon avans klè sou lòt la. Dimanch 4 novanm nan, Prezidan Barack Obama te mennen kanpay nan eta sa a kote li pan lapawòl devan yon foul patizan pou l di:

“Pou sila yo pami nou, zanmi nou, oubyen vwazen nou ki poko pran yon desizyon, kite m di se pa sèlman yon chwa ant 2 kandida oubyen 2 pati; se yon chwa ant 2 vizyon pou avni Lèzetazini. Se yon chwa ant yon retou nan politik dwat-e-gòch ki te kraze ekonomi peyi a, epi yon politik ki baze sou yon klas mwayèn ki fò, kap grandi; politik ki te wete nou nan kriz la.”

Pandansetan, rival repibliken Prezidan Obama a, Mitt Romney, te fè yon vizit nan eta Pennsilvani, ki sou kot ès Lèzetazini, kote sandaj yo montre Misye Obama gen yon avans solid sou kandida repibliken an. Misye Romney pale ak yon foul moun pou l di yo li pa twò ta pou elektè Pennsilvavi yo vote pou mennen peyi a nan yon direksyon tou nèf. Misye Romney deklare:

“Se sèlman 2 jou ki separe nou ak yon nouvo depa ; 2 jou sèlman anvan nou lanse yon nouvo kòmansman. Konviksyon mwen genyen deske nou genyen yon pi bèl avni devan nou, pa baze sou pwomès ak bèl pawòl; men li baze sou plan solid e sou rezilta ki fè prèv yo ; li baze sou fwa innebranlab nou genyen nan lespri ameriken an. "

Lendi 4 novanm nan, Prezidan Obama pral vizite Eta Wisconsin, Iowa ak Ohio kote li pral anime kèk meeting de mas anvan li ale nan eta kote li gen rezidans prive li (an palan de Eta Ilinwa) ; se la li pral rete pandan tout jounen madi a pou l swiv rezilta eleksyon yo.

Kantapou Gouvènè Romney, sou pwogam li pou jounen lendi a, nou jwenn li pral fè yon vizit nan Eta Florid anvan li retounen nan 3 eta li deja vizite nan jou ki fèk pase yo, an palan de Vijini, Ohio ak New Hempshire.

An plis eleksyon prezidansyèl la, ameriken yo ap vote tou pou yo chwazi 435 manm Chanm dè Reprezantan an (donk, Chamm Depite a) epi 33 sou 100 manm Sena a.
XS
SM
MD
LG