Accessibility links

Breaking News

Etazini - Eleksyon: Kandida yo Twoke Kòn yo nan Dènye Deba Prezidansyèl la


President Barack Obama, right, and Republican presidential nominee Mitt Romney discuss a point during the third presidential debate at Lynn University in Boca Raton, Florida, October 22, 2012.
Nan 3èm e dènye deba anvan eleksyon prezidansyèl 6 novanm yo , Prezidan Barack Obama ak rival repibliken li, Mitt Romney twoke kòn yo sou kesyon ki gen rapò ak politik etranjè pami yo repons Etazini sou gè sivil Siri a , pwogram nikleyè Iran an ak depans ki gen arevwa ak defans.

90 minit deba sa a te ofri opòtinite bay gouvènè Romney pou kalme dout yo sou kapasite l pou l jere gwo defi nan politik etranjè. Se te yon okazyon tou pou prezidan Obama ranfòse imaj ke l genyen kòm yon lidè ki pi byen ekipe pou fè fas politik etranjè ak kesyon ki gen rapò ak sekirite nasyonal la. Gouvènè Romney denonse sa l rele evenman twoublan ki rive pandan premye manda prezidan Obama nan Mezon Blanch la pami yo 30 mil moun ki mouri nan Siri, atak kont ameriken nan Libi e yon Iran ki 4 tran pi pre posesyon zam nikleyè.

Libi ak lanmò ameriken nan Bengazi te nan deba a tou kote Prezidan Obama repete detèminasyonn pou jwenn asasen yo. Mesye Romney di , prezidan an echwe nan demach pou founi bon jan strateji pou fè fas ak mouvman ekstremis mizilman k ap monte dizèt wotè nan lemond.

Mesye Romney di: “Mwen felisite l ( an plan de prezidan Obama ) dèske li elimine Osama bin Laden e lage koukouj dèyè lidèchip al-Qaida, men sa paka elimine erè nou fè pou soti nan dezòd sa a . Nou pral mete an plas yon strateji djanm e byen detaye pou ede mond Islamik ak lòt pati nan lemond rejte ekstremism vyolan e radikal. “

Mesye Obama bò kote pal di li resantre atansyon l soti Irak pou ale ann Afganistan e demantle al-Qaida pandan ke li mansyone tranzisyon pou mete fen nan wòl konba Etazini an disi 2014. Gouvènè Romney dakò ak prezidan Obama sou delè 2014 la. Anpil fwa pandan deba a , prezidan Obama di plan ak pwopozisyon mesye Romney pa bon epi yo ensousyan e li di tou gouvènè a ap plede chanje pozisyon tan-zan-tan.

Mesye Obama di : " Ou te di nou te dwe ale ann Irak malgre le fèt ke pat genyen vrèman zam ki ka detwui moun pa banm-e-pa-pakèt ; ou te di nou te dwe toujou gen sòlda ann Irak jounen jodiya a . Ou te endike ke nou pat dwe siyen trete nikleyè ak Larisi malgre gen 71 senatè demokrat e repibliken ki te vote l."

2 kandida yo fè diskisyon sou dosye Siri a, men yo dakò pou di ke sòlda ameriken pa ta dwe patisipe nan afwontman sou teren an. Pandan deba sa a , mesye Obama ak Mesye Romney fè dikisyon tout sou kèk kesyon cho ankò tankou dosye Pakistan, Mwayen-Oryan, Lachinn sou kesyon komèsyal, Pwogram nikleyè Iran an.

Yon nouvo sondaj opinyon ki te soti anvan sondaj la te montre 2 kandida yo te gen 47. Se Jounalis chèn televizyon CBS Bob Schieffer ki te modere deba yè swa a ki te dure 90 minit e ki te santre sou politik Afè Etranjè Etazini---deba ki te dewoule nan Boca Raton nan eta Florid.
XS
SM
MD
LG