Accessibility links

Rankont Prezidan Obama ak Lidè Opozisyon Bimani an, Aung San Suu Kyi

  • Ekip Sèvis Kreyòl VOA

Prezidan Barack Obama rankontre, nan La Mezon Blanch, ak lidè opozisyon an nan peyi Birmani e ansyen Lorea Pri Nobèl Lapè, Aung San Suu Kyi. Se premye rankont Madam Suu Kyi ak Prezidan Obama ki se yon loreya Pri Nobèl Lapè tou.

Rankont la, ki te dewoule ak tout pòt fèmen, fè pati pwogram premye vizit Madam Suu Kyi o Zetazini depi lidè militè biman yo te ba li libète li an 2010 aprè yo te fè l pase 15 zan an rezidans siveye.

Nan yon deklarasyon La Mezon Blanch fè parèt aprè rankont la, Prezidan Obama di jan li gen admirasyon pou kouraj Madam Aung San Suu Kyi, pou detèminasyon li ak sakrifis pèsonèl li fè nan lit pou defann demokrasi ak respè dwamoun nan Bimani.

Misye Obama fè konpliman tou pou pwogè lidè mouvman demokratik la nan Birmani ak prezidan peyi a reyalize nan efò yo fè nan travay ansanm pou pote refòm nan sosyete biman an e nan vi politik la nan Bimani.

Anvan rankont la, pòtpawòl Mezon Blanch la, Jay Carney, te chante lwaj Madam Suu Kyi pou batay li livre nan non demokrasi ak refòm.

Misye Carney deklare:
“Li livre yon batay ki debouche jounen jodiya sou vizit lap fè isit la e sou bon jan refòm kap fèt nan Bimani anba direksyon ak lidèchip Prezidan Thein Sein."

Nouvèl la atire atansyon sou le fèt ke, an jeneral, vizitè Prezidan ameriken an resevwa nan Biwo Oval la se Prezidan ak Premye Minis.

Se konsa rankont ak Madam Suu Kyi a dewoule an tout trankilite, san prezans kamera ni jounalis.

Yon lòt pwen ki merite siyale, sè ke vizit lidè opozisyon Bimani an ap dewoule preske nan menm moman ak vizit Prezidan biman an, Thein Sein, pral fè semèn pwochèn nan nan New York kote li gen pou l asiste sesyon asanble jeneral l’ONU an.

Pòtpawòl Mezon Blanch la, Jay Carney, fè konpliman pou Misye Sein pou wòl li jwe nan refòm ki kòmanse fèt nan peyi li.

Misye Carney di:
“Nou kontinye ap travay ak Prezidan Thein Sein e ak gouvènman laba a, menm jan nap travay ak lòt moun pou kore koz refòm nan epi ede pwosesis demokratik la avanse laba a.”

Kèk analis panse administrasyon Obama a ap eseye wè si vizit Madam Suu Kyi a pa ta eklipse vizit Prezidan Biman an.
XS
SM
MD
LG