Accessibility links

Aparèy Eksploratè Ameriken "Curiosity" Debake San Pwoblèm sou Planèt Mas

  • J. Lyonel Desmarattes

Foto atis wobo Curiosity Ajans Espasyal Ameriken (Nasa) voye sou planèt Mas la. Aparèy la poze san pwoblèm sou planèt wouj la

La Nasa di yon wobo ki gen yon laboratwa syantifik abò l debake san pwoblèm sou «Mars» kote li pra l fè divès kalite rechèch sou planèt la.

La Nasa (Ajans Lèzetazini pou eksplorasyon espasyal la) fè konnen yon aparèy eskploratè ameriken debake san pwoblèm sou « Mars » pou l fè rechèch sou egzistans mikwòb sou planèt la. Aparèy–la ki peze yon tòn e kap fonksyone ak enèji nikleyè–rele « Curiosity » e li te pase 8 mwa sou wout. Li pral chache prèv ki kapab montre si wi ou non mikwòb egziste sou planèt Mars. Se konsa tou, Curiosity pral pran foto e ranmase lòt kalite done sou planèt wouj la pou l voye sou latè.

Daprè savan La Nasa yo, debakman aparèy sa a sou Mas se operasyon konsa ki te gen plis defi ladan yo janm eseye jiskisi. Curiosity te genyen 7 minit sèlmanpou l itilize yon parachit e fè lòt mannèv ki te nesesè san fot pou li te redui vitès li dekwa pou debakman an te pase san danje. Yon moun ka konprann dimansyon danje sa a si nou di ke aparèy la tap deplase ak yon vitès 20 mil kilmèt alè.

Curiosity se pyès metrès yon laboratwa syantifik Nasa mete sou pye pou misyon Mas la e ki koute 2 milya 500 milyon dola. Li genyen 17 kamera abò li; li pral sèvi ak yo pou li voye foto ak done ki nesesè pou savan yo kapab konnen si lavi egziste ou te egziste sou Mas. Se konsa tou, li ale anlè a avèk divès kalte enstriman ki pral etidye jewoloji planèt la, kalte meteo ak nivo radyasyon ki egziste sou Mas pandan 2 zan kap vini la yo.

Your opinion

Show comments

XS
SM
MD
LG