Accessibility links

Breaking News

Pap Benwa 16 Retounen Vatikan Aprè 3 jou Vizit nan Kiba


Pap Benwa 16 mete fen mèkredi nan yon vizit 3 jou nan Kiba kote li te rive lendi. Se premye vwayaj ofisyèl Souvren Pontif la nan peyi karayib la kote li rankontre ak ansyen lidè kiben en, Fidel Castro.

Pandan jounen mèkredi a, Sen Pè a selebre yon mès an plènè sou Plas Revolisyon an nan La Avàn devan yon foul fidèl moun pa kapab konte. Nan omeli li a, Benwa 16 di kijan li kontan wè pwogrè ki fèt nan domèn libète otorite yo bay Legliz Katolik nan Kiba. Sepandan, li atire atansyon sou le fèt ke peyi a toujou izole e sou anbago Lèzetazini mete sou il la depi 50 tan. Li di bagay yo dwe chanje nan Kiba.

"Kiba ak lemond bezwen chanjman. Men chanjman sa a pap rive toutotan chak nan nou pa kòmanse chache laverite e chwazi chemen lanmou an, pandan l ap simen plan rekonsilyasyon ak fratènite a."

Anvan pap la te debake Kiba, li te lanse apèl bay gouvènman an pou mande l rekonèt sistèm maksis la: "Pa koresponn ankò ak reyalite a nan Kiba jounen jodiya."

Pandan Vis-Prezidan kiben an, Marino Murrilo, tap bay yon konferans pou laprès madi, li te rejte apèl pap la lè li te di: “Nan Kiba pap gneyen pyès refòm politik.”

Anpil pami moun ki te prezan nan mès an plenè Souvren Pontif la te chante mèkredi anvan li te kite Kiba, te vini paske yo gen lafwa, yo se bon jan fidèl katolik ; men genyen lòt ki te vini sèlman pa kiryozite. Sepandan, pa genyen anpil ki panse vizit chèf Legliz Katolik Womèn nan pral mennen chanjman li swete wè otorite yo pote nan Kiba.

XS
SM
MD
LG