Prezidan ameriken an, Barack Obama, deklare li gen konfyans lidè ewopeyen yo gen kapasite pou yo rezoud pwoblèm ekonomik kontinan an e li pa kwè genyen peyi ki pap fonksyone oubyen ki pap pwodwi.
Pandan l t ap pale ak laprès apre Somè G-20 an nan Los Cabos O Meksik, prezidan Obama presize tout pwoblèm kontinan ewopeyen an se pwoblèm ki gen solusyon.
Prezidan Obama di: "Premyèman, zanmi ewopeyen nou yo konprann klèman seryozite sitiyasyon an e y ap avanse avèk ijans . Mwen aplodi yo franchi kote yo fè pwomosyon pou kwasans , stabilite finansye e ak responsabilite fiskal. Mwen kontan anpil ke lidè ewopeyen ki la yo di yo pral pran mezi nesesè pou pwoteje entegrite ak stabilite Ewozòn nan pou amelyore fonksyonman mache finansye yo ."
Nan deklarasyon final Somè a, lidè G-20 yo rekonèt ekonomi mondyal la ka frajil e li gen enpak negatif sou la vi ak djòb popilasyon atravè lemond.