Ministè Ransèyman Iran an fè konnen, 8 jen 2017 la, 5 nan mesye yo ki te mele nan atak sou palman peyi a ak sou tonm ansyen lidè Ayatollah Ruhollah Khomeini sete moun peyi Iran ki te antre nan gwoup Eta Islamik la.
Ministè a fè konnen mesye yo te goumen pou Eta Islamik nan vil Mosoul ann Irak, e nan vil Raqqa nan peyi Siri, anvan yo te retounen nan Iran nan mwa Daout ane pase. Otorite iranyen yo monte bilan atak mèkredi 7 jen 2017 la kote 17 moun mouri ak 40 lòt blese.
Se 2 atak ak mitrayèt 2 kamikaz te lanse prèske menm lè kote gwoup Eta Islamik la te revandike l, e ki ka deklannche yon nouvo seri batay nan Mwayenn Oryan an ki deja anba gwo tansyon.