Prezidan Barack Obama prezante yon nouvo plan defans ki bay detay sou pwojè gouvènman li a genyen pou l koupe plizyè milya dola sou bibjè Pentagòn nan (kidonk Depatman Defans la) nan kad yon tranzisyon aprè Lèzetazini pase yon dizèn dane nan lagè. Misye Obama di administrasyon n nan ap chache adapte fòs zame amerikèn yo yon fason pou l kapab adopte yon apwòch tou nèf lè li gen pou fè fas ak konfli.
Prezidan Obama deklare :
"Nou genyen opòtinite ak responsablite pou n gade ann avan pou n wè ki fòs zame n ap bezwen nan lavni."
Bò kote pa l, minis defans ameriken an, Leon Panetta, pale pou l di Lèzetazini pral konsève kapasite li genyen pou l fè fas ak plizyè ennmi an menm tan.
Misye Panetta di :
"Tout branch fòs zame Lèzetazini yo ansanm pral pi piti, yo pral genyen mwens moun ; men tou yo pral pi ajil, pi mobil, pi fleksib; y ap pare pou yo ale pran pozisyon nenpòt ki kote avèk rapidite; y ap fè chanjman pozitif gras ak teknoloji nouvèl yo."
Avèk nouvo plan Prezidan Obama detaye jedi a, bidjè Depatman Defans la pral sibi yon bès omwen 450 milya dola.