Accessibility links

Breaking News

Wyclef Jean Soti Yon Chante Pou Make 6 Mwa Apre Tranblemanntè a Te Frape Ayiti


Mizisyen e chantè ayisyano-ameriken Wyclef Jean fè parèt yon mizik tou nèf pou make 6 mwa depi yon tranblemanntè te sakaje Ayiti kote plis pase 200 mil moun te mouri ak plis pase yon milyon lòt pa gen kote pou yo abite. Mizik la rele "Yon Jou Apre". Wyclef di chante a se yon apèl li lanse pou l mande otorite responsab yo pran dispozisyon pou yo chanje sa, nan moman kondisyon imanitè ak ekonomik peyi a ap deteryore. Chanson sa a rezime plan Wyclef Jean genyen pou l pote konkou l nan efò k ap fèt pou rezoud pwoblèm Ayiti ap konfwonte jounen jodi a.

Mizik la bay detay sou demach vedèt la te fè pou l chache zanmi ak fanmi li ki te mouri nan dezas la, li pale de debri ki toujou nan lari yo ak destriksyon enfrastrikti peyi a sibi. Pawòl yo fè sonje kantite kadav ki nan lari Pòtoprens aprè tranblemanntè a, ti òfelen ki t ap sikile toupatou, santiman Wyclef lè l te fin pa rankontre youn nan zanmi l yo ki te disparèt epi li di kijan li te kenbe pitit-fi youn nan zanmi sa yo ki te mouri nan gwo soukous la. Wyclef sèvi ak pawòl sa yo pou l fè mizik la tounen yon sòt de pòtpawòl ki di sa l panse pèsonèlman de sitiyasyon an ann Ayiti 6 mwa aprè trajedi 12 janvye 2010 la. "Yon Jou Apre" okipe premye pozisyon sou denye album Wyclef Jean an ki gen kòm tit Eksperyans Ayisyen. Album sa a prezante lavi yon ayisyen Ozetazini.

XS
SM
MD
LG