Accessibility links

Prezidan Trump Defann Atak Li Kont Kèk Jwè Pwofesyonèl Lig Foutbòl Ameriken an

  • Ekip Sèvis Kreyòl VOA

Jwè ekip pwofesyonèl foutbòl ameriken ki pote non: New England Patriots la. (Foto:AP/Michael Dwyer) Houston, Texas, 24 septanm 2017.

Jwè yo pa vle kanpe pou yo salye im nasyonal la yon fason pou yo “denonse rasism ak britalite lapolis” sou minorite yo.

Prezidan Donald Trump defann atak li te lanse sou kèk jwè pwofesyonèl foutbòl ameriken ki refize rete kanpe pandan im nasonal la ap jwe. Daprè Misye Trump, “sa pa gen okenn rapò ak ras yon moun”, menm si anpil nan jwè konsène yo deklare se yon fason pou yo denonse rasism ak britalite lapolis egzèse sou minorite yo Ozetazini.

Manm youn nan ekip yo, The Dallas Cowboys --san bliye pwopriyetè ekip la ak antrenè a-- yo tout te mete a jenou pandan im nasyonal la tap chante nan sware lendi 25 septanm 2017 la anvan kòmansman yon rankont ekip la ta pral jwe kont The Arizona Cardinals, yon match Dallas ranpòte sou yon skò 28 a 17.

Nan menm lendi swa a Vis Prezidan ameriken an, Mike Pence, bay opinyon li sou dosye a pandan li te nan Eta Alabama kote li tap mennen kanpay pou yon kandida pou yon pòs nan kongrè a. Misye Pence deklare:

“Nou tout gen dwa eksprime opinyon nou. Men, mwen pa panse nou egzije twòp si nou mande jwè Lig Nasyonal Foutbòl la leve kanpe pou im nasyonal la; mwen si e sèten pèp Alabama a dakò avèk mwen.”

Prezidan ameriken an Donald Trump, adwat, kap bay Premye minis Espay la, Mariano Rajoy, lamen nan lakou Lamezon Blanch, 26 septanm 2017.
Prezidan ameriken an Donald Trump, adwat, kap bay Premye minis Espay la, Mariano Rajoy, lamen nan lakou Lamezon Blanch, 26 septanm 2017.

Sa gen 4 jou Prezidan Trump te kòmanse pawòl-anpil sa a nan yon lòt aktivite ki tap dewoule nan Eta Alabama lè li te itilize kèk gwo mo pou l pale de jwè ki pa vle rete kanpe pou salye im nasyonal la. Misye Trump te di:

Lè yon moun derespekte drapo nou an, èske nou pa ta renmen wè youn nan mèt ekip nan lig nasyonal la deklare: “Fout wete vye vakabon sa a sou teren an kounyela a menm; di l “Li revoke; li fout revoke...”

Jwè San Francisco 49èm quarterback, Colin Kaepernick (7) ansanm ak outside linebacker Eli Harold (58) ajenou pandan yo tap chante im nan syonal Etazini an nan jwèt foutbòl NFL nan Atlanta Falcons, Atlanta.
Jwè San Francisco 49èm quarterback, Colin Kaepernick (7) ansanm ak outside linebacker Eli Harold (58) ajenou pandan yo tap chante im nan syonal Etazini an nan jwèt foutbòl NFL nan Atlanta Falcons, Atlanta.

Nan sware dimanch la plizyè santèn jwè, antrenè ak pwopriyetè ekip te defye Prezidan Trump lè yo te rete chita, mete a jenou epi yo te fè yon chèn dinyon ak bra yo pandan mizik im nasyonal la tap jwe anvan dewoulman 14 match ki te sou pwogram nan, olye yo te fè jès tradisyonèl kote sitwayen ameriken yo mete men yo sou lestomak yo pou montre yo apiye drapo a avèk peyi a.

XS
SM
MD
LG