Accessibility links

Etazini Politik: Prezidan Obama Lonje Men Bay Repibliken yo

  • Coralie Saint-Louis

Ozetazini, Prezidan Barack Obama lanse apèl pou l mande konpwomi ak Repibliken yo aprè pati li a (Pati Demokrat la) fin anrejistre yon gwo defèt nan eleksyon lejislativ yo; sepandan lidè repibliken yo reponn pou yo di pral genyen kowoperasyon si --e sèlman si— prezidan an deside chanje direksyon pou li mache nan lojik pa yo.

Pandan misye Obama te pran lapawòl aprè yon rankont ak manm kobinè ministeryè li a, li deklare li lanse apèl bay 2 pi gwo lidè repibliken yo (Lidè minorite a nan Sena a, Mitch McConnel ak Depute John Boehner ), pou l mande yo fè yon rankont ak lidè majorite a nan Sena a, Harry Reid, e ak aktyèl prezidan Lachanm nan, Nancy Pelosi, nan dat 18 novanm pwochen. Depute Boehner kapab tounen prezidan Chanm Bass la lè nouvo kongrè a va rekòmanse travay nan mwa janvye 2011 la.

Daprè Prezidan Obama, rankont sa a pral santre sitou sou sa ki kapab fèt pou dirijan ameriken yo fè fas ak pwoblèm ekonomik ijan yo, anvan nouvo kongrè a kòmanse travay. Li kontinye pou l di li enpötan pou dirijan Lèzetazini yo ale de lavan, paske pèp ameriken an pa vle pou gouvènman an bloke nan deba sou mezantant ant 2 pati yo, epi pou l rete san fè anyen.

Se konsa tou prezidan an lanse apèl bay gouvènè ki fèk eli yo (demokrat kou republiken) pou yo fè yon rankont avèk li mwa pwochen an pou l kapab tande opinyon yo sou preokipasyon yo konsènan pwoblèm ki poze nan eta yo pral dirije yo. Pandansetan, senatè McConnel genyen pou l bay detay jodi jedi 4 novanm 2010 la sou pwogram pati politik li a (an palan de pati repibliken an) ; pami pwogram sa yo, genyen presyon ki pral fè pou pati repibliken an repran la Mezon Blanch nan men prezidan Obama.

XS
SM
MD
LG