Accessibility links

Kanada Ouvè yon Stad Olempik pou l Resevwa Plizyè Santèn Imigran Ayisyen Kap Kouri Kite Etazini

  • Ekip Sèvis Kreyòl VOA

Yon gwoup imigran ki soti Djibouti ak Somalie travèse fwontyè Etazini pou yo antre nan peyi Kanada. 27 mas 2017.

Otorite nan peyi Kanada, itilize plizyè kabann pou kan nan stad Olempik Monreyal la pou akeyi mèkredi 2 out 2017 la yon gwoup refijye ayisyen kap kouri kite Etazini pou yo pa depòte yo.

Genyen yon pakèt refijye prensipalman ayisyen, ki debake an mas semèn sa a nan peyi Kanada---sa ki vin ogmante kantite imigran yo depi Prezidan Donald Trump monte sou pouvwa a isit Ozetazini. Pou sèl jounen madi premye out la, genyen anviwon 500 moun ki fè demand dazil.

Moun sa yo te travèse fwontyè Etazini pataje ak Kanada nan zòn La Colle ki nan sid Québec. 90 pousan nan yo se ayisyen. Rezon prensipal ki lakoz yap kouri kite Etazini se laperèz kote otorite amerikèn yo anvizaje koupe pwogram Stati Pwoteksyon Tanporè a (TPS) disi fen ane 2017 la pou imigran ayisyen ki te deja genyen l yo.

Apre yon gwo tranblemandtè te ravaje peyi Dayiti 12 janvye 2010 kote plizyè moun ak byen te disparèt, Prezidan ameriken alepòk la, Barack Obama, te akòde TPS ak prèske 60,000 ayisyen, e administrasyon li an te toujou renouvle l chak ane pou imigran sa yo ki te deja ap viv Ozetazini san dokiman legal, puiske sitiyasyon an toujou rete trè difisil ann Ayiti e ke nasyon karayib la poko fin reveye li vrèman vre anba gwoudou gwoudou 12 janvye a.

Vil Monreyal di refijye ayisyen yo "Bienvenue". Majistra vil la, Denis Coderre, deklare sou kont Twitter li: "Nou kapab konte sou kolaborasyon total-kapital nou.” Marjorie Villefrance ki se direktris jeneral Mezon Dayiti nan Monreyal di ajans nouvèl AFP, se yon solisyon pwovizwa paske yo dwe jwenn lojman ak lekòl pou timoun yo nan okazyon ouvèti lekòl la.

XS
SM
MD
LG